روس پاکستان کو فضائی صنعت کی ترقی میں مدد دے گا

اسلام آباد (صداۓ روس)
اسلام آباد میں پاکستان اور روس کے تجارت، معیشت، سائنس اور تکنیکی تعاون کے بارے میں بین الحکومتی کمیشن کا آٹھواں اجلاس ہوا۔ اس اجلاس کی سربراہی روس کے وزیر توانائی نکولے شولگینوف اور پاکستان کے وفاقی وزیر اقتصادی امور سردار ایاز صادق نے کی۔ روسی فیڈریشن کی فیڈرل ایئر ٹرانسپورٹ ایجنسی اور اسلامی جمہوریہ پاکستان کی سول ایوی ایشن اتھارٹی کے درمیان فضائی صنعت میں کام کرنے سے متعلق معاہدہ ہوا ہے۔ اجلاس کے دوران پاکستان اور روس کے درمیان 3 معاہدے طے پاگئے جن میں کسٹم معاملات میں تعاون اور باہمی مدد سے متعلق معاہدہ، ایئر ٹرانسپورٹ کے شعبے میں تعاون پر اتفاق کیا گیا، جس میں ڈیٹا ایکسچینج کا تعاون بھی شامل ہے۔ پاک-روس ایروناٹیکل مصنوعات کی فضائی قابلیت پرکام کرنے کا معاہدہ بھی طے پاگیا ہے۔

اس کے علاوہ روس نے فضائی اور سمندری شعبوں میں تعاون بڑھانے اور مشترکہ اقدامات اٹھانے کی منصوبہ بندی کی ہے۔ یاد رہے اس سے قبل پاکستان نے 2019 میں روس سے شہری فضائی مصنوعات حاصل کرنے میں سنجیدگی کا اظہار کیا تھا. تین برس قبل روس کی جانب سے ایم سی 21 درمیانی حد کے مسافر بردار طیارے کے منصوبے پر عملدرآمد کے اسٹیٹس پر پاکستان کو آگاہ کیا گیا اور اس کی سپلائی میں دلچسپی کے ساتھ ساتھ پاکستان میں بنیادی تربیت کیلئے ایس ایس جے 100 مختصر رینج اور یاک 152 جہاز کے فروغ میں دلچسپی کا اظہار کیا گیا۔ پاکستان کی جانب سے ان معلومات کا مطالعہ کرنے اور روس کو ان جہازوں کی جامع پریزنٹیشن دینے کیلئے باضابطہ درخواست بھیجنے میں دلچسپی دکھائی گئی۔ تاہم آج چار برس بعد روس اور پاکستان کے درمیان فضائی صنعت کے حوالے سے باضابطہ معاہدہ طے پا گیا جس کے بعد روسی طیارے پاکسانی بین القوامی پرواز میں بھی استعمال ہو سکتے ہیں.