یوکرین کے ساتھ مذاکرات میں یورپی مداخلت کو خاطر میں نہیں لائیں گے، روس
ماسکو (صداۓ روس)
روس نے یورپ کی جانب سے یوکرین کے ساتھ جاری مذاکرات میں رخنہ ڈالنے کی کوششوں کو مسترد کرتے ہوئے واضح کیا ہے کہ وہ اپنے مؤقف پر قائم رہے گا اور کسی بھی دباؤ کے آگے نہیں جھکے گا۔ یہ بیان روسی بیرونی انٹیلیجنس سروس (ایس وی آر) کے ڈائریکٹر سرگئی ناریشکن نے روسی خبررساں ایجنسی تاس کو انٹرویو دیتے ہوئے دیا۔
ان کا کہنا تھا: ’’ہم پُرعزم انداز میں اپنی راہ پر گامزن رہیں گے۔‘‘ ناریشکن سے جب یورپی مداخلت کے خلاف روسی حکمتِ عملی کے بارے میں سوال کیا گیا تو انہوں نے یہ بات کہی۔
اس سے قبل بھی انہوں نے تاس کو بتایا تھا کہ بعض یورپی ممالک کی حکومتیں روس اور یوکرین کے درمیان جاری مذاکرات کی اصل نوعیت کو مسخ کرنے کی کوشش کر رہی ہیں۔ ان کے مطابق یورپی دارالحکومتوں سے آنے والے بیانات روسی موقف کو غلط انداز میں پیش کرتے ہیں اور ان اہداف کو توڑ مروڑ کر پیش کرتے ہیں جو ماسکو ان مذاکرات میں حاصل کرنا چاہتا ہے۔
روسی انٹیلیجنس چیف کے اس بیان کو ان حالات میں بڑی اہمیت دی جا رہی ہے جب مغربی دنیا کی جانب سے روس پر دباؤ بڑھانے کی کوششیں جاری ہیں، جبکہ ماسکو مذاکرات کے ذریعے یوکرین کے تنازع کا حل نکالنے پر زور دیتا رہا ہے۔
