روسی فوج نے دریائے وولچیا پر قائم پل تباہ کر دیا
ماسکو (صداۓ روس)
روسی فوج نے دنیپروپیٹروسک کے علاقے پوکروسکوی کے قریب دریائے وولچیا پر قائم ایک پل کو تباہ کر دیا ہے تاکہ یوکرینی افواج تک ہتھیاروں، فوجی سازوسامان اور گولہ بارود کی رسد کو روکا جا سکے۔ روسی وزارتِ دفاع کے مطابق، “پوکروسکوی کے نزدیک روسی فوجی یونٹس کی کامیاب کارروائیوں کو یقینی بنانے اور یوکرینی افواج کو اسلحہ، گولہ بارود اور سپلائیز پہنچنے سے روکنے کے لیے پل کو تباہ کرنے کا فیصلہ کیا گیا۔” بیان میں کہا گیا کہ یہ حملہ روسی فضائیہ کے عملے نے فضا سے داغے گئے ہتھیاروں کے ذریعے کیا، جس کے نتیجے میں وہ پل، جسے یوکرینی جنگجو استعمال کر رہے تھے، مکمل طور پر ناکارہ ہو گیا۔ وزارتِ دفاع نے مزید بتایا کہ حملے کے بعد حاصل ہونے والی ریئل ٹائم مانیٹرنگ فوٹیج سے تصدیق ہو گئی ہے کہ پل اب ناقابلِ استعمال ہے اور دشمن کی سپلائی لائن منقطع ہو چکی ہے۔
