ماسکو(انٹرنیشنل ڈیسک)
روسی وزیر خارجہ سرگئی لاوروف اور بھارتی وزیر خارجہ سب رامنیم جائشنکر نے دوطرفہ اعلیٰ سطح کے رابطوں، اسٹریٹجک پارٹنرشپ کے مستقبل اور مشرق وسطیٰ کی صورتحال پر تفصیلی گفتگو کی ہے۔ روسی وزارت خارجہ کے مطابق دونوں وزرائے خارجہ نے کلیدی دوطرفہ امور اور اعلیٰ سطح کے آنے والے رابطوں کے شیڈول پر بات چیت کی۔ دونوں فریقوں نے “خصوصی مراعات یافتہ اسٹریٹجک پارٹنرشپ” کو آگے بڑھانے، تجارت اور معاشی تعلقات کو وسعت دینے اور پائیدار مالی، زرعی اور ٹرانسپورٹ لاجسٹکس کے نظام کو مضبوط بنانے کا عزم ظاہر کیا۔ ملاقات میں مشرق وسطیٰ کی موجودہ صورتحال پر بھی خصوصی توجہ دی گئی۔ دونوں وزرائے خارجہ نے جدید ٹیکنالوجیز، توانائی کے شعبے اور پرامن خلائی تحقیق میں تعاون کے امکانات کو سراہا۔ روسی وزارت خارجہ نے بتایا کہ دونوں فریقوں نے بین الاقوامی تعلقات میں کثیر القطبی ڈھانچے کو مضبوط بنانے اور ایک منصفانہ عالمی معاشی نظام قائم کرنے کی اہمیت پر اتفاق کیا۔ دونوں ممالک نے اقوام متحدہ، شنگھائی تعاون تنظیم (SCO)، برکس اور G20 جیسے فورمز میں اپنے موقف کو ہم آہنگ کرنے کے عزم کا اعادہ کیا۔ ملاقات میں دیگر علاقائی اور عالمی مسائل پر بھی تبادلہ خیال کیا گیا۔
