روس کا آواز سے 30 گنا تیز رفتار یارس میزائل کا کامیاب تجربہ
ماسکو (صداۓ روس)
روس نے ملک کی نیوکلیئر ڈٹرنس کے تین شعبوں یعنی زمینی، بحری اور فضائی عناصر کی جانچ اور مشقیں مکمل کی ہیں۔ یہ مشقیں روسی صدر ولادیمیر پوتن کی نگرانی میں بدھ کو منعقد کی گئیں، اور دفاعی وزارت نے اس کا ویڈیو فوٹیج جاری کیا۔ مشقوں کے دوران شمالی روس کے پلیسٹسک ریاستی ٹیسٹ کاسمودرام سے ایک زمینی یارس انٹرکانٹینینٹل بیلسٹک میزائل (ICBM) کو روس کے دور دراز مشرقی علاقے کامچاتکا میں واقع ٹیسٹ سائٹ کی طرف لانچ کیا گیا۔ ویڈیو میں میزائل کی تیاری اور لانچ کی کارروائی دکھائی گئی ہے۔ دفاعی وزارت کے مطابق مشقوں میں بحری آئی سی بی ایم سینوا کو روسی نیوکلیئر سب میرین بریانسک سے بارینٹس سی میں لانچ کیا گیا، جبکہ ٹی یو-95 اسٹرٹیجک بمبار طیاروں سے ایئر-لانچڈ کروز میزائل بھی چھوڑے گئے۔ روس کے چیف آف جنرل اسٹاف والیری گیرسیموف نے صدر پوتن کو بتایا کہ مشقوں میں نیوکلیئر ہتھیار استعمال کرنے کے اجازت نامے کے طریقہ کار کی مشق بھی شامل تھی۔ یہ مشقیں روس-بیلاروس کے زاپاد 2025 مشقوں کے ایک ماہ بعد ہوئیں، جن میں 41 تربیتی مراکز اور 100,000 سے زائد سروس ممبران شریک تھے۔ ان مشقوں میں متعدد ممالک کے فوجی نگران بھی موجود تھے، جن میں امریکہ کے نمائندے بھی شامل تھے۔
کریملن نے اس موقع پر یہ واضح کیا کہ یہ مشقیں کسی بھی ریاست کے خلاف نہیں تھیں، اور یہ صرف دفاعی تیاری اور اسٹرٹیجک صلاحیت بڑھانے کے لیے کی گئی ہیں۔ 
