روسی ایوانِ زیریں کے سربراہ کی چینی صدرسے ملاقات، صدر پوتن کا پیغام پہنچا دیا
ماسکو (صداۓ روس)
روس کی اسٹیٹ ڈوما کے چیئرمین ویچسلاو وولودین نے بیجنگ میں چین کے صدر شی جن پنگ سے ملاقات کی اور انہیں صدر ولادیمیر پوتن کی جانب سے نیک خواہشات اور مبارکباد کا پیغام پہنچایا۔ یہ ملاقات صدر پوتن کے آئندہ ہفتے چین کے چار روزہ دورے سے قبل ہوئی ہے۔ ملاقات کے دوران وولودین نے کہا کہ روسی اور چینی قیادت کے درمیان ذاتی تعلقات نے دونوں ممالک کے درمیان ہر شعبے میں تعاون کی فضا قائم کی ہے، اور روس اس امر کا پابند ہے کہ دونوں ممالک کی قیادت کی سطح پر ہونے والے فیصلوں پر عمل درآمد کیا جائے۔ انہوں نے صدر شی کو روسی فیڈرل اسمبلی اور چین کی نیشنل پیپلز کانگریس کے درمیان بین الپارلیمانی کمیشن کے دسویں اجلاس کے بارے میں بھی آگاہ کیا جو اسی روز منعقد ہوا۔ اجلاس میں کئی اہم امور زیرِ بحث آئے جن میں مغربی پابندیوں کے دباؤ کا مقابلہ، دونوں ممالک کے اندرونی معاملات میں بیرونی مداخلت کی روک تھام، تجارتی و اقتصادی تعلقات کا فروغ اور انسانی بنیادوں پر تعاون کو مزید بڑھانا شامل ہے۔
یوکرین تنازع کے 2022 میں شدت اختیار کرنے کے بعد چین نے روس پر مغربی ممالک کی جانب سے عائد پابندیوں میں شامل ہونے سے انکار کر دیا تھا اور اس کے بجائے ماسکو کے ساتھ قریبی معاشی تعلقات قائم رکھے۔ ملاقات کے دوران صدر شی جن پنگ نے روس اور چین کے درمیان بڑھتے ہوئے تعاون کو سراہا اور زور دیا کہ دونوں ممالک کو اپنی روایتی دوستی کو جاری رکھتے ہوئے اسٹریٹجک اعتماد کو مزید گہرا کرنا چاہیے۔ چینی صدر نے روس کے ساتھ تعلقات کو دنیا کی بڑی طاقتوں کے درمیان سب سے مستحکم، پختہ اور اسٹریٹجک اعتبار سے اہم قرار دیا۔ یہ ملاقات صدر پوتن کے دورہ چین سے قبل ہوئی ہے، جہاں وہ صدر شی جن پنگ سے بڑے پیمانے پر مذاکرات کریں گے اور شنگھائی تعاون تنظیم کے اجلاس میں بھی شرکت کریں گے۔ روسی ذرائع ابلاغ کے مطابق یہ صدر پوتن کا 2014 کے بعد سب سے طویل غیر ملکی دورہ ہوگا۔
