امریکی تیل کی پاکستان کو فراہمی جاری، دوسرا جہاز پاکستانی سمندری حدود میں
اسلام آباد (صداۓ روس)
پاکستان میں توانائی کے شعبے میں تنوع کے لیے امریکی خام تیل لے کر آنے والا دوسرا بحری جہاز پاکستانی سمندری حدود میں داخل ہو گیا ہے۔ یہ جہاز ایم ٹی البانی ہے اور آج بلوچستان کے ساحل پر واقع سنرجیکو آئل ٹرمینل پر برتھ کرے گا۔ اس سے قبل پہلا امریکی تیل بردار جہاز ایم ٹی پیگاسس 29 اکتوبر کو پاکستانی بندرگاہ پر پہنچ چکا ہے۔
سنرجیکو آئل کمپنی کے مطابق، کمپنی نے پہلی بار 10 لاکھ بیرل ویسٹ ٹیکساس انٹرمیڈیٹ (WTI) کروڈ آئل درآمد کیا ہے، اور یہ اقدام اسلام آباد اور واشنگٹن کے درمیان طے شدہ تجارتی معاہدے کے تحت انجام دیا جا رہا ہے۔ جہاز پیگاسس امریکی شہر ہیوسٹن سے 14 ستمبر کو روانہ ہوا تھا اور 29 اکتوبر کو سنرجیکو کے آف شور ٹرمینل پر لنگر انداز ہوا۔ سنرجیکو آئل کمپنی کا کہنا ہے کہ امریکی تیل کی یہ درآمد پاکستان اور امریکہ کے درمیان دوطرفہ تجارت کے فروغ میں ایک اہم سنگ میل ہے اور اس سے پاکستان میں توانائی کے شعبے میں نئی راہیں کھلیں گی اور درآمدی ذرائع میں تنوع آئے گا۔
