بحرالکاہل میں 3,000 گاڑیوں سے لدے بحری جہاز میں آگ لگ گئی
ماسکو (انٹرنیشنل ڈیسک)
چین سے میکسیکو جانے والا ایک کارگو بحری جہاز ‘مارننگ مائیڈاس’ بحرالکاہل میں آگ کی لپیٹ میں آ گیا۔ جہاز پر موجود تمام 22 عملہ کے افراد کو بحفاظت نکال لیا گیا ہے۔ یہ واقعہ الاسکا کے ساحل سے تقریباً 300 میل جنوب مغرب میں پیش آیا۔ بحری جہاز پر مجموعی طور پر 3,000 گاڑیاں لدی تھیں، جن میں سے تقریباً 750 الیکٹرک اور ہائبرڈ گاڑیاں تھیں۔ امریکی کوسٹ گارڈ کے مطابق جہاز نے منگل کی سہ پہر امداد کے لیے پیغام بھیجا، جس کے بعد قریبی تین تجارتی جہازوں اور کوسٹ گارڈ کے اپنے بحری و فضائی یونٹس کو مدد کے لیے روانہ کیا گیا۔
‘مارننگ مائیڈاس’ ایک لائبیریا کے جھنڈے کے تحت چلنے والا، برطانیہ سے منظم کردہ جہاز ہے۔ کمپنی زوڈیاک میری ٹائم کے مطابق، آگ 3 جون کو رات 12 بجے (یو ٹی سی) کے قریب لگی۔ امریکی حکام کے مطابق جہاز میں تقریباً 1,900 میٹرک ٹن ایندھن بھی موجود ہے، تاہم عملے کو محفوظ نکالنے کے بعد آگ بجھانے کی کوشش نہیں کی گئی۔ حکام کا کہنا ہے کہ جہاز میں موجود لیتھیم آئن بیٹریاں آگ لگنے کی صورت میں زوردار دھماکے اور زہریلی گیسیں خارج کر سکتی ہیں، اس لیے فی الحال آگ کو خود ہی بجھنے دیا جا رہا ہے۔ نیو یارک ٹائمز کے مطابق، الاسکا کوسٹ گارڈ کی ترجمان شینن کرنی کا کہنا ہے کہ اس قسم کے الیکٹرک آلات میں لگی آگ کو بجھانا انتہائی خطرناک ہو سکتا ہے، اس لیے محتاط حکمت عملی اپنائی گئی ہے۔ تاحال یہ واضح نہیں ہو سکا کہ آگ کس وجہ سے لگی، اور جہاز کو مکمل نقصان پہنچا ہے یا نہیں۔ ماہرین خدشہ ظاہر کر رہے ہیں کہ اگر آگ قابو میں نہ آئی، تو اس سے ماحول پر بھی منفی اثرات مرتب ہو سکتے ہیں، خصوصاً سمندری حیات کو خطرہ لاحق ہو سکتا ہے۔
