بھارت میں طیارہ حادثے کا واحد زندہ بچ جانے والا شخص منظرِ عام پرآگیا
ماسکو (انٹرنیشنل ڈیسک)
بھارت میں حالیہ مسافر طیارہ حادثے میں زندہ بچ جانے والے واحد شخص کی شناخت اور تصویر منظرِ عام پر آ گئی ہے۔ میڈیا رپورٹس کے مطابق، زندہ بچنے والے شخص کا نام وشواس کمار رمیش ہے، جن کی عمر تقریباً چالیس سال ہے اور وہ برطانیہ کے شہری ہیں۔ خبری ادارے نیوز ۱۸ نے پولیس کے حوالے سے بتایا ہے کہ رمیش اپنے اہلِ خانہ سے ملنے بھارت آئے تھے اور اپنے بھائی کے ہمراہ برطانیہ واپس جا رہے تھے۔ حادثے کے وقت وہ طیارے کی نشست 11-اے پر بیٹھے تھے۔
وشواس رمیش نے ہندوستان ٹائمز سے گفتگو کرتے ہوئے بتایا پرواز کے تیس سیکنڈ بعد ایک زوردار آواز آئی اور پھر طیارہ گر گیا۔ سب کچھ بہت تیزی سے ہوا، کچھ سمجھنے کا موقع ہی نہیں ملا۔ وشواس رمیش کی زندگی بچ جانا ایک معجزے سے کم نہیں سمجھا جا رہا، کیونکہ اس ہولناک حادثے میں طیارے کے دیگر تمام مسافر جان کی بازی ہار گئے۔ سوشل میڈیا پر بھی ان کے بچ جانے پر حیرت اور خوشی کا اظہار کیا جا رہا ہے، جبکہ حکام نے ان سے واقعے کی تفصیلات حاصل کرنے کا عمل شروع کر دیا ہے تاکہ حادثے کی وجوہات کا تعین کیا جا سکے۔
