سری لنکا کامیاب، آسٹریلیا ٹی20 ورلڈ کپ کے پہلے مرحلے سے باہر ہونے کے دہانے پر
ماسکو (انٹرنیشنل ڈیسک)
ٹی20 ورلڈ کپ 2026 کے گروپ بی کے اہم میچ میں سری لنکا نے آسٹریلیا کو 8 وکٹوں سے باآسانی شکست دے کر سپر ایٹ مرحلے کے لیے کوالیفائی کر لیا ہے۔ اس شکست کے نتیجے میں آسٹریلیا اب ٹورنامنٹ کے پہلے مرحلے سے باہر ہونے کے دہانے پر پہنچ گیا ہے۔
آسٹریلیا نے ٹاس جیت کر پہلے بیٹنگ کرتے ہوئے مقررہ 20 اوورز میں 181 رنز بنائے اور پوری ٹیم آؤٹ ہو گئی۔ کپتان مچل مارش نے 54 اور ٹریوس ہیڈ نے 56 رنز کی دھواں دار اننگز کھیلیں۔ جوش انگلس 27 اور گلین میکسویل 22 رنز کے ساتھ نمایاں رہے۔
سری لنکا کی بولنگ میں دشان ہیمانتھا نے 3 وکٹیں حاصل کیں جبکہ دشمانتھا چمیرا نے 2، مہیش تھیکشنا، کمنڈو مینڈس اور دونتھ ویلالاگے نے ایک ایک وکٹ لی۔
ہدف کے تعاقب میں سری لنکا نے آسٹریلیا کو مکمل طور پر آؤٹ کلاس کر دیا۔ اوپنر پاتھم نسانکا نے 100 رنز کی ناقابل شکست سنچری اسکور کی اور ٹیم کو 8 وکٹوں سے فتح دلائی۔ ان کی اس شاندار اننگز کی بدولت انہیں میچ کا بہترین کھلاڑی قرار دیا گیا۔
کوشل مینڈس نے 51 اور پاون رتنانائیکے نے 28 رنز کی مفید اننگز کھیلیں۔ آسٹریلیا کی جانب سے مارکس اسٹوئنس نے 2 وکٹیں حاصل کیں۔
اس ناکامی کے ساتھ آسٹریلیا ٹورنامنٹ کے پہلے مرحلے سے باہر ہونے کے قریب پہنچ چکا ہے۔ اسی گروپ میں سری لنکا اور زمبابوے کے میچ کا فاتح زمبابوے ہو گا یا میچ ڈرا ہوا تو آسٹریلیا ایونٹ سے باہر ہو جائے گا اور زمبابوے سپر ایٹ کے لیے کوالیفائی کر لے گا۔
تاہم اگر زمبابوے شکست کھاتا ہے تو وہ ورلڈ کپ سے باہر نہیں ہو گا بلکہ اس کے سپر ایٹ میں پہنچنے کا انحصار آسٹریلیا کی عمان کے خلاف بڑے مارجن سے کامیابی اور رن ریٹ پر ہو گا۔
