امریکہ کی بالادستی کا دورختم ہو چکا ہے، امریکی نائب صدر کا اعتراف
ماسکو (انٹرنیشنل ڈیسک)
امریکہ کے نائب صدر جے ڈی وینس نے اعتراف کیا ہے کہ دنیا میں امریکہ کی بلا چیلنج بالادستی کا دور ختم ہو چکا ہے۔ انہوں نے یہ بات میری لینڈ کے شہر ایناپولس میں نیول اکیڈمی کی گریجویشن تقریب سے خطاب کرتے ہوئے کہی۔ وینس کا کہنا تھا کہ سرد جنگ کے بعد امریکہ نے فضا، سمندر، خلا، سائبر اسپیس اور دیگر شعبوں میں نسبتاً بلا چیلنج برتری حاصل کی ہوئی تھی، مگر اب وہ دور ختم ہو چکا ہے۔ انہوں نے واضح کیا کہ آج امریکہ کو چین، روس اور دیگر ممالک کی جانب سے ایسے چیلنجز درپیش ہیں جو ہر میدان میں امریکہ کو پیچھے چھوڑنے کے لیے سرگرم ہیں – چاہے وہ اسپیکٹرم ہو، لو ارتھ آربٹ، سپلائی چینز یا ابلاغی ڈھانچے۔
وینس نے کہا کہ سوویت یونین کے زوال کے بعد امریکی پالیسی سازوں نے یہ فرض کر لیا تھا کہ امریکہ کی عالمی قیادت ہمیشہ کے لیے محفوظ ہو چکی ہے اور کوئی دوسرا ملک مقابلہ نہیں کر سکتا۔ تاہم ان کے بقول ہم نے سخت طاقت کے بدلے نرم طاقت کو ترجیح دی، اور یہی ہماری غلطی تھی۔ یہ بیان اس عالمی حقیقت کا واضح اعتراف ہے کہ آج کی دنیا میں طاقت کا توازن تیزی سے بدل رہا ہے اور امریکہ کو پہلی بار کئی محاذوں پر حقیقی مسابقت کا سامنا ہے۔
