اسلام آباد (صداۓ روس)
گرمیوں کا موسم آتے ہی پاکستانی بازار آموں کی خوشبو سے مہک اٹھتے ہیں۔ سنہری رنگ، رسیلا ذائقہ اور دل کو بھانے والی مٹھاس رکھنے والا آم نہ صرف ذائقے میں لاجواب ہے بلکہ صحت کے لیے بھی بے شمار فوائد کا حامل ہے۔ ماہرین آم کو پھلوں کا بادشاہ قرار دیتے ہیں۔ آم دنیا کے قدیم ترین پھلوں میں شمار ہوتا ہے اور اس کی کاشت تقریباً چار ہزار سال پرانی ہے۔ دنیا بھر میں آم کی سینکڑوں اقسام پائی جاتی ہیں جن کے ذائقے، رنگ اور خوشبو ایک دوسرے سے مختلف ہیں۔ پاکستان آم کی پیداوار کے حوالے سے دنیا کے اہم ممالک میں شامل ہے۔ ملتان کو آموں کا شہر کہا جاتا ہے جہاں کا مشہور “چونسہ” آم دنیا بھر میں پسند کیا جاتا ہے۔ سندھ کے علاقے میرپورخاص میں “سندھڑی” آم اپنے بڑے سائز اور مٹھاس کی وجہ سے مشہور ہے، جبکہ پنجاب میں “انور رٹول”، “لنگڑا”، “دسیہری” اور “فجر کلیاں” جیسی اقسام مقبول ہیں۔ آم میں وٹامن اے، وٹامن سی، فائبر اور متعدد معدنیات موجود ہوتی ہیں جو قوت مدافعت بڑھاتی ہیں، آنکھوں کی صحت کے لیے مفید ہیں اور نظام ہاضمہ کو بہتر کرتی ہیں۔ گرمیوں میں آم جسم کو تازگی اور توانائی فراہم کرتا ہے۔ اس کے علاوہ جلد کی خوبصورتی بڑھانے اور مختلف بیماریوں سے بچاؤ میں بھی آم مددگار ثابت ہوتا ہے۔
