ماسکو (صداۓ روس)
امریکی جریدے دی نیشنل انٹرسٹ نے موجودہ میدانِ جنگ کے لیے دنیا کے بہترین ٹینکوں کی فہرست جاری کرتے ہوئے روس کے ٹی-72 ٹینک کو پہلی پوزیشن پر رکھا ہے۔
رپورٹ کے مطابق ٹی-72 کو بقا کی صلاحیت، دفاعی نظام، طویل فاصلے تک سفر کرنے کی استعداد، کم رسد کے باوجود مسلسل جنگی کارروائی جاری رکھنے، جدید اپ گریڈ امکانات، آسان تیاری، کثیر المقاصد استعمال، اسٹریٹجک اثر اور دفاعی طاقت کی بنیاد پر سرفہرست قرار دیا گیا۔ جریدے کے مطابق ٹی-72 ایک مؤثر ٹینک کے لیے تمام ضروری معیار پر پورا اترتا ہے۔ رپورٹ میں کہا گیا کہ ڈرونز جیسے جدید ہتھیاروں کے استعمال کے باوجود ٹی-72 یوکرین جنگ میں روسی کامیابی میں اہم کردار ادا کر سکتا ہے۔ درجہ بندی میں امریکا کے ایم ون ایبرامز ٹینک کو دوسرے جبکہ اسرائیل کے مرکاوا فائیو کو تیسرے نمبر پر رکھا گیا ہے۔
ٹی-72 ٹینک پہلی بار سن 1973 میں سوویت فوج میں شامل کیا گیا تھا۔ اس کی تیاری یورال واگون زاواد کے ڈیزائن بیورو نے کی تھی، جو اب روسی سرکاری ادارے روستیک کے تحت کام کرتا ہے۔ یہ ٹینک دنیا کے تقریباً 50 ممالک کی افواج میں استعمال ہو رہا ہے۔ گزشتہ دہائیوں میں اس کے کئی جدید ماڈلز متعارف کرائے گئے جن میں ٹی-72 اے، ٹی-72 بی، ٹی-72 بی اے، ٹی-72 بی3 اور جدید ترین ٹی-72 بی3 ایم شامل ہیں۔
