صدر پوتن سےبات ہوئی وہ بھی ایران- اسرائیل جنگ کا خاتمہ چاہتے ہیں، ٹرمپ
ماسکو (انٹرنیشنل ڈیسک)
امریکی صدر ڈونلڈ ٹرمپ نے کہا ہے کہ ان کی روسی صدر ولادیمیر پوتن سے ہفتے کے روز ٹیلیفون پر بات چیت ہوئی، جس میں دونوں رہنماؤں نے اس بات پر اتفاق کیا کہ ایران اور اسرائیل کے درمیان جاری تنازع کا خاتمہ ہونا چاہیے۔ ٹرمپ نے اس گفتگو کو “اہم اور بامقصد” قرار دیتے ہوئے کہا کہ عالمی سطح پر امن و استحکام کے لیے اس خونریز تصادم کا رکنا ضروری ہے۔ انہوں نے مزید کہا کہ امریکہ اور روس دونوں فریقوں پر سفارتی دباؤ ڈالنے کے لیے تیار ہیں تاکہ مذاکرات کے ذریعے مسائل کو حل کیا جا سکے۔ اس سے قبل روس نے اسرائیل کی جانب سے ایران پر کیے گئے حملوں کی مذمت کی تھی اور اقوام متحدہ سمیت مختلف عالمی فورمز پر اس معاملے کو اٹھانے کا اعلان کیا تھا، جب کہ امریکہ نے حالیہ حملے میں کسی قسم کی شمولیت سے انکار کرتے ہوئے خود کو اس سے الگ قرار دیا ہے۔
اس پیش رفت سے یہ عندیہ ملتا ہے کہ بڑی عالمی طاقتیں اس تنازع کو بڑھنے سے روکنے کے لیے کسی حد تک تعاون پر آمادہ ہو چکی ہیں۔ تاہم، زمینی حقائق اور فریقین کے بیانات اس بات کی نشاندہی کرتے ہیں کہ کشیدگی کے مکمل خاتمے کے لیے ابھی مزید اقدامات درکار ہوں گے۔
