روس اور جاپان کے ساحلی علاقوں میں سونامی کی تباہ کاریاں
ماسکو(صداۓ روس)
روس کے کوریل جزائر اور جاپان کے شمالی جزیرے ہوکائیدو کے ساحلی علاقوں میں بدھ کی صبح ایک شدید زلزلے کے بعد سونامی کی لہریں ٹکرائیں، جس سے خطے میں شدید خطرات اور ہنگامی صورتحال پیدا ہوگئی۔ زلزلے کی شدت 8.8 درج کی گئی جو کہ سمندر کی گہرائی میں روسی ساحل کے قریب واقع ہوئی۔ اس زلزلے کے فوری بعد سونامی کی وارننگ جاری کی گئی، اور چند ہی لمحوں میں بلند سمندری لہریں ساحلی علاقوں سے ٹکرانے لگیں۔ مقامی حکام نے ساحلی علاقوں سے لوگوں کے انخلاء کے احکامات جاری کیے اور ہنگامی امدادی ٹیمیں متحرک کر دی گئیں۔ کوریل جزائر اور ہوکائیدو کے کئی مقامات پر پانی رہائشی علاقوں میں داخل ہوگیا، تاہم اب تک جانی یا مالی نقصانات کی تفصیلات سامنے نہیں آئی ہیں۔ ماہرین کا کہنا ہے کہ سونامی کی لہریں کئی میٹر بلند تھیں اور مزید جھٹکوں کا خدشہ اب بھی برقرار ہے۔
روس اور جاپان دونوں ممالک کی حکومتوں نے صورتحال پر کڑی نظر رکھی ہوئی ہے اور مقامی آبادی سے کہا گیا ہے کہ وہ محفوظ مقامات پر منتقل ہو جائیں اور حکام کی ہدایات پر سختی سے عمل کریں۔ زلزلے اور سونامی کے اس واقعے نے ایک بار پھر خطے میں قدرتی آفات سے نمٹنے کے نظام کو چیلنج کر دیا ہے اور مستقبل میں ممکنہ خطرات کے پیش نظر مزید تیاری کی ضرورت پر زور دیا جا رہا ہے۔
