برطانیہ اور فرانس یوکرین کو جوہری ہتھیار دے سکتے ہیں، روس
ماسکو (صداۓ روس)
اقوامِ متحدہ کی سلامتی کونسل کے اعلیٰ سطحی اجلاس میں روس نے الزام عائد کیا ہے کہ برطانیہ اور فرانس یوکرین کو جوہری ہتھیار یا نام نہاد “ڈرٹی بم” فراہم کرنے کی منصوبہ بندی کر رہے ہیں۔ روس کے مستقل مندوب ویسلی نیبنزیا نے اجلاس سے خطاب کرتے ہوئے کہا کہ روسی داخلی انٹیلی جنس سروسز کی ایک “غیر معمولی رپورٹ” میں لندن اور پیرس کے مبینہ منصوبوں کی نشاندہی کی گئی ہے۔ نیبنزیا کے مطابق 24 فروری کو روسی انٹیلی جنس کے پریس بیورو نے ایک رپورٹ جاری کی جس میں دعویٰ کیا گیا کہ برطانیہ اور فرانس کی جانب سے کیئف کو جوہری ہتھیار یا “ڈرٹی بم” کے ساتھ ساتھ ان کی ترسیل کے ذرائع دینے پر غور کیا جا رہا ہے۔ انہوں نے مزید الزام لگایا کہ اس میں مبینہ طور پر فرانسیسی کمپیکٹ TN75 وارہیڈ سے متعلق آلات، پرزہ جات اور ٹیکنالوجی کی خفیہ منتقلی شامل ہو سکتی ہے۔
روسی مندوب نے یورپی ممالک پر جنگ کو طول دینے کا الزام بھی عائد کیا اور کہا کہ امن کی کوششوں کے بجائے کشیدگی میں اضافہ کیا جا رہا ہے۔ برطانیہ اور فرانس کی جانب سے ان الزامات پر فوری ردِعمل سامنے نہیں آیا، جبکہ یوکرین نے ماضی میں اس نوعیت کے دعوؤں کو مسترد کیا ہے۔ سلامتی کونسل کے اجلاس میں دیگر رکن ممالک نے بھی صورتِ حال پر اپنے اپنے مؤقف پیش کیے، تاہم روس کے الزامات کی آزادانہ تصدیق ممکن نہیں ہو سکی۔ 
