امریکا کی پاکستان کے ایف-16 طیاروں کیلئے جدید ٹیکنالوجی کی فروخت کی منظوری
ماسکو (انٹرنیشنل ڈیسک)
امریکا نے پاکستان کے ایف-16 لڑاکا طیاروں کے لیے 686 ملین ڈالر مالیت کے جدید ٹیکنالوجی پیکیج کی فروخت کی منظوری دے دی ہے۔ یہ منظوری امریکی ڈیفنس سیکیورٹی کوآپریشن ایجنسی (DSCA) نے 8 دسمبر کو کانگریس کو بھیجے گئے خط کے ذریعے دی، جس میں بتایا گیا ہے کہ یہ اقدام پاکستان کی موجودہ اور مستقبل کے خطرات سے نمٹنے کی صلاحیت برقرار رکھنے میں اہم کردار ادا کرے گا۔ خط کے مطابق اس پیکیج میں لنک-16 ڈیٹا لنک سسٹمز، کرپٹوگرافک آلات، ایویونکس اپ گریڈز، تربیت، اور جامع لاجسٹیکل سپورٹ شامل ہیں۔ یہ تمام ٹیکنالوجیز پاکستان کے ایف-16 بیڑے کی استعداد کو بڑھانے اور اسے جدید تقاضوں کے مطابق برقرار رکھنے کے لیے فراہم کی جا رہی ہیں۔
ڈی ایس سی اے کے مطابق یہ فیصلہ واشنگٹن کی وسیع تر خارجہ پالیسی اور قومی سلامتی کے اہداف سے ہم آہنگ ہے۔ اس سے پاکستان کو انسدادِ دہشت گردی کی جاری کارروائیوں اور مستقبل کے ہنگامی حالات میں امریکی اور اتحادی افواج کے ساتھ تعاون اور ہم آہنگی برقرار رکھنے میں مدد ملے گی۔ امریکی خط میں کہا گیا ہے کہ یہ اپ گریڈنگ پاکستان کے بلاک–52 اور مڈ لائف اپ گریڈ (MLU) ایف-16 طیاروں کے بیڑے کو جدید بنانے، اس کی بقا اور پائیداری میں اضافہ کرنے اور اس کی آپریشنل زندگی 2040 تک بڑھانے میں معاون ثابت ہوگی۔ 
