ماسکو(انٹرنیشنل ڈیسک)
امریکی اسپیشل فورسز کے ایک اہلکار کو خفیہ معلومات استعمال کرتے ہوئے وینزویلا کے صدر Nicolas Maduro کے خلاف فوجی کارروائی پر سٹا لگانے کے الزام میں گرفتار کر لیا گیا ہے، جس کے بعد اس معاملے نے عالمی سطح پر توجہ حاصل کر لی ہے۔ امریکی حکام کے مطابق فوجی اہلکار Gannon Ken Van Dyke نے مبینہ طور پر وینزویلا میں ہونے والی کارروائی سے متعلق خفیہ معلومات کا فائدہ اٹھاتے ہوئے آن لائن پلیٹ فارم Polymarket پر بھاری رقم کی شرطیں لگائیں۔ استغاثہ کے مطابق انہوں نے تقریباً 33 ہزار ڈالر کی شرط لگا کر 4 لاکھ ڈالر سے زائد منافع حاصل کیا۔ رپورٹس کے مطابق مذکورہ فوجی اس آپریشن کی منصوبہ بندی اور عملدرآمد میں شامل تھا، جس کے باعث اسے غیر عوامی اور حساس معلومات تک رسائی حاصل تھی، اور اسی بنیاد پر اس نے متعدد شرطیں لگائیں۔ امریکی محکمہ انصاف کے مطابق ملزم پر وائر فراڈ، کموڈیٹیز فراڈ، اور سرکاری معلومات کے غیر قانونی استعمال سمیت متعدد الزامات عائد کیے گئے ہیں، جبکہ اس کے خلاف مقدمہ درج کر کے قانونی کارروائی شروع کر دی گئی ہے۔
حکام کا کہنا ہے کہ یہ امریکہ میں اپنی نوعیت کا پہلا بڑا کیس ہے جس میں کسی فوجی اہلکار پر پیشگوئی پر مبنی مارکیٹ میں اندرونی معلومات کے استعمال کا الزام لگایا گیا ہے۔
اس واقعے کے بعد آن لائن بیٹنگ پلیٹ فارمز پر بھی سوالات اٹھنے لگے ہیں، جہاں عالمی سیاسی اور فوجی واقعات پر شرطیں لگائی جاتی ہیں۔ رپورٹس کے مطابق حالیہ جنگی صورتحال کے دوران اربوں ڈالر کی مشکوک شرطیں سامنے آئی ہیں، جس کے باعث ان پلیٹ فارمز کی نگرانی سخت کرنے کا مطالبہ کیا جا رہا ہے۔ امریکی حکام نے اس معاملے کو قومی سلامتی اور اعتماد کی سنگین خلاف ورزی قرار دیا ہے، جبکہ وائٹ ہاؤس کی جانب سے بھی سرکاری اہلکاروں کو ایسی سرگرمیوں سے دور رہنے کی ہدایت کی گئی ہے
