شی جن پنگ نے چینی فوج میں کرپٹ عناصر کے خلاف سخت وارننگ جاری کردی
ماسکو(انٹرنیشنل ڈیسک)
چینی صدر شی جن پنگ نے فوج میں بدعنوانی کے خلاف جاری مہم کو جاری رکھنے کا عزم ظاہر کرتے ہوئے کہا ہے کہ فوج میں پارٹی کے غیر وفادار اور کرپٹ عناصر کے لیے کوئی جگہ نہیں ہونی چاہیے۔ یہ بیان انہوں نے ہفتے کے روز پیپلز لبریشن آرمی (PLA) اور پیپلز آرمیڈ پولیس کے نمائندوں سے خطاب کرتے ہوئے دیا۔ صدر شی نے اپنے خطاب میں کہا کہ فوج میں فنڈز کے بہاؤ، اختیارات کے استعمال، اور معیار پر سخت نگرانی کی ضرورت ہے، خاص طور پر ملک کے آئندہ پانچ سالہ منصوبے میں جو اس مہینے منظور ہونے والا ہے۔ انہوں نے واضح کیا کہ بدعنوانی اور غیر وفاداری کے خلاف کسی قسم کی رعایت نہیں کی جائے گی۔ شی جن پنگ نے 2023 میں اپنے تیسرے دور اقتدار کے آغاز کے بعد فوج اور چینی کمیونسٹ پارٹی کے پولیٹ بیورو میں بدعنوانی کے خلاف سخت اقدامات شروع کیے۔ اس مہم کے نتیجے میں مرکزی ملٹری کمیشن (CMC) کے متعدد ارکان اور سینکڑوں جنرلز برطرف کیے جا چکے ہیں۔ 2023 میں دو سابقہ دفاعی وزراء کو بھی پارٹی سے نکالا گیا۔
اس سال کے اوائل میں چینی حکام نے CMC کے وائس چیئرمین ژانگ یوکشیا کے خلاف بدعنوانی کی تحقیقات شروع کیں، جن پر “ڈسپلن اور قانون کی سنگین خلاف ورزی” کے شبہات ہیں۔ مغربی میڈیا کے مطابق ژانگ پر الزام تھا کہ انہوں نے چین کے جوہری پروگرام سے متعلق معلومات امریکہ کو فراہم کیں۔ اسی دوران، سینٹرل انٹیلی جنس ایجنسی (CIA) نے PLA کے اندر خفیہ معلومات رکھنے والے اہلکاروں کو بھرتی کرنے کی کوششیں دوبارہ شروع کی ہیں، اور اس کے لیے چینی زبان میں اشتہارات جاری کیے گئے ہیں۔ چینی وزارت خارجہ نے اس پر شدید ردعمل ظاہر کرتے ہوئے کہا کہ وہ “غیر ملکی مخالف چین قوتوں کی مداخلت اور تخریب کاری” کے خلاف بھرپور اقدامات کرے گی۔
