قازق صدر کا مرسڈیز کی بجائے روسی ساختہ اورس سینیٹ کار استعمال کا فیصلہ
ماسکو (صداۓ روس)
روسی میڈیا کے مطابق قازقستان کے صدر کسیم جومارٹ توکایف گزشتہ ہفتے قازان میں بریکس سربراہی اجلاس کے دوران روسی ساختہ اورس سینیٹ کی لیموزین میں گھوم رہے تھے اور توقع کے مطابق انہوں نے اپنی مرسڈیز میں سفر نہیں کیا. دنیا بھر کے رہنما 16ویں بریکس سربراہی اجلاس کے لیے روسی شہر میں جمع ہوئے تھے، جس میں 30 سے زائد غیر ملکی وفود کی میزبانی کی گئی، اس طرح کی تقریبات میں ٹرانسپورٹ کے تمام خصوصی انتظامات شامل ہیں۔
رپورٹ کے مطابق توکایف کی اورس سینیٹ لیموزین سیدھی قازقستان سے ڈیلیور کی گئی تھی، اس کی لائسنس پلیٹیں اس سیریز سے تعلق رکھتی ہیں جو وسطی ایشیائی ملک کی اسٹیٹ سیکیورٹی سروس استعمال کرتی ہیں۔ بین الاقوامی اجتماع میں دیگر عالمی رہنما بھی اورس کاروں میں سوار تھے، تاہم یہ بکتر بند تھیں اور روس کی فیڈرل پروٹیکٹیو سروس کے اسپیشل پرپز گیراج کے ذریعے فراہم کی گئی تھیں۔ ویب سائٹ کے مطابق توکایف کی ایگزیکٹو سیڈان میں کچھ جدید خصوصیات ہیں۔