سینیٹر طلال چودھری نے بانی پی ٹی آئی کے خط سے متعلق سوالات اٹھا دیئے

سینیٹر طلال چودھری نے بانی پی ٹی آئی کے خط سے متعلق سوالات اٹھا دیئے
اسلام آباد (صداۓ روس)

حکمران جماعت مسلم لیگ (ن) کے سینیٹر طلال چوہدری نے پاکستان تحریک انصاف (پی ٹی آئی) کے بانی چیئرمین کی جانب سے آرمی چیف کو لکھے گئے خط پر سخت ردعمل دیتے ہوئے اسے بدنیتی پر مبنی قرار دیا ہے۔

پارلیمنٹ ہاؤس کے باہر “جیو نیوز” سے گفتگو کرتے ہوئے طلال چوہدری نے کہا کہ بانی پی ٹی آئی کے خط سے یہ تاثر پیدا کرنے کی کوشش کی گئی کہ ان کی سزاؤں کے پیچھے اسٹیبلشمنٹ کا ہاتھ ہے، حالانکہ حقیقت اس کے برعکس ہے۔ انہوں نے کہا کہ خط پبلک ہونے کا مقصد محض ایک بیانیہ تشکیل دینا تھا، جبکہ جسے لکھا گیا وہ خط اسے ملا ہی نہیں۔ اگر واقعی کسی کو پیغام پہنچانا ہوتا تو اسے خفیہ رکھا جاتا اور عوامی سطح پر نہ لایا جاتا۔

سینیٹر طلال چوہدری نے واضح کیا کہ بانی پی ٹی آئی کو جو سزائیں ہوئی ہیں، ان کے پیچھے اسٹیبلشمنٹ نہیں بلکہ ان کے اپنے اعمال اور کرتوت ہیں۔ انہوں نے کہا کہ بانی پی ٹی آئی کو کسی نے مجبور نہیں کیا تھا کہ وہ 190 ملین پاؤنڈز کی کرپشن کریں۔ اسی طرح، 9 مئی اور 26 نومبر کے واقعات میں بھی کوئی انہیں مجبور نہیں کر رہا تھا، بلکہ یہ ان کی اپنی مرضی اور حکمت عملی کا نتیجہ تھا۔

طلال چوہدری نے مزید کہا کہ جس کا کام بولتا ہو، اسے زیادہ بات کرنے کی ضرورت نہیں ہوتی۔ انہوں نے کہا کہ پاکستان مسلم لیگ (ن) کے قائد نواز شریف روزانہ تقریریں کرنے یا دھمکیاں دینے پر یقین نہیں رکھتے، کیونکہ ان کی کارکردگی خود ان کے لیے بولتی ہے۔ اس کے برعکس، پی ٹی آئی کے بانی ہر روز نئی تقریریں کر کے اپنی ناکامیوں پر پردہ ڈالنے کی کوشش کرتے ہیں۔

طلال چوہدری نے دعویٰ کیا کہ بانی پی ٹی آئی کی طرف سے یہ خط لکھنے کا مقصد اپنی سیاسی پوزیشن مضبوط کرنا اور اپنی سزاؤں کے حوالے سے ایک نیا بیانیہ تشکیل دینا تھا، تاکہ عوام میں یہ تاثر پیدا کیا جا سکے کہ وہ اسٹیبلشمنٹ کی سازش کا شکار ہوئے ہیں۔