ماسکو (صداۓ روس)
روس کے قانون نافذ کرنے والے اداروں نے امریکی سرکاری میڈیا آؤٹ لیٹ ریڈیو فری یورپ/ریڈیو لبرٹی (RFE/RL) کی ایک ایڈیٹر السو کرماشیوا کو غیر ملکی ایجنٹ کے طور پر رجسٹر کرنے اور حساس فوجی ڈیٹا اکٹھا کرنے کی ناکام کوشش پر حراست میں لے لیا ہے۔
مقامی خبر رساں ایجنسی تاتار انفارم کے مطابق، کرماشیوا کو وسطی روس کے شہر کازان سے گرفتار کیا گیا۔ اطلاعات کے مطابق یہ امریکی صحافی پراگ شہر میں رہتی تھی۔
تاتار انفارم نے اپنی رپورٹ میں اس معاملے سے واقف ذرائع کا حوالہ دیتے ہوئے دعویٰ کیا ہے کہ تفتیش کاروں کا خیال ہے کہ ستمبر 2022 میں، کرماشیوا، جس کے پاس روسی اور امریکی دونوں پاسپورٹ ہیں، جان بوجھ کر روس کی سرگرمیوں سے متعلق فوجی ڈیٹا اکٹھا کر رہی تھی تاکہ اسے مزید امریکی ذرائع تک منتقل کیا جا سکے۔ جو ممکنہ طور پر قومی سلامتی کو نقصان پہنچا سکتا ہے۔
ذرائع کے مطابق خیال کیا جاتا ہے کہ امریکی میڈیا آؤٹ لیٹ کیایڈیٹر نے متعدد مقامی یونیورسٹیوں کے پروفیسروں کے بارے میں بھی ڈیٹا حاصل کیا ہے جو مبینہ طور پر یوکرین کے تنازعے کے دوران متحرک ہو گئے تھے۔ خبر رساں ایجنسی کا دعویٰ ہے کہ اس کے بعد اس نے اس معلومات کو غیر ملکی اداروں کے لیے “متبادل تجزیاتی مواد” مرتب کرنے کے لیے استعمال کیا تاکہ روس کو بدنام کیا جا سکے۔