امریکہ نے درجنوں غیر قانونی ازبک شہری ڈیپورٹ کر دئیے

ماسکو (انٹرنیشنل ڈیسک)
ازبک میڈیا نے رپورٹ کیا کہ امریکی حکام نے ١١٩ ازبک شہریوں کو واپس ازبکستان واپس بھیج دیا جو ملک میں غیر قانونی طور پر داخل ہوئے تھے. ازبک ٹیلی ویژن کے نمائندے نے تاشقند ہوائی اڈے پر آنے والے ازبک شہریوں سے ملاقات کی۔ امریکہ سے ڈپورٹ ہونے والے ان ازبک شہریوں کی فوٹیج ایجنسی فار ایکسٹرنل لیبر مائیگریشن کے ٹیلی گرام چینل پر پوسٹ کی گئی ہے. اطلاعات کے مطابق ان میں سے بیشتر نے میکسیکو کے راستے امریکہ جانے کی کوشش کی۔

غیر قانونی طور پر امریکہ جانے والے والوں میں سے ایک نے بتایا کہ وہ پیسے کمانے کے لیے امریکہ گیا تھا۔ ایک دوست کے ساتھ مل کر وہ ایک اسٹور میں لوڈرز کی نوکری حاصل کرنا چاہتے تھے اور ماہانہ دس سے بارہ ہزار ڈالر کمانا چاہتے تھے۔ اس شخص کا کہنا تھا کہ وہ ٣ ستمبر کو امریکا پہنچا اور اس کے بعد سے اسے ١١٠ دن تک حراست میں رکھا گیا۔ اس نے شکایت کی کہ قید میں کھانے کا مناسب بندوبست نہیں کیا گیا. ڈپورٹ ہونے والے ازبک شخص کے میکسیکو کے سفر میں ٣٠ دن لگے، اور پھر اس سے سرحد پار سے امریکہ منتقل کرنے کے لیے پانچ ہزار امریکی ڈالر مانگے گئے۔ ان کے مطابق انہیں راستے میں پولیس افسران نے حراست میں لیا جنہوں نے انہیں ملک بدری کی دھمکی دی، جس کی وجہ سے انہیں مزید دو ہزار ڈالر بطور رشوت ادا کرنے پڑے۔

فاکس نیوز چینل نے امریکی کسٹمز اینڈ بارڈر پروٹیکشن سروس کے اندرونی اعداد و شمار کا حوالہ دیتے ہوئے اس سے قبل اطلاع دی تھی کہ اکتوبر ٢٠٢١ سے اکتوبر ٢٠٢٣ تک ازبکستان کے ١٣ ہزار سے زائد شہریوں کو امریکہ میں غیر قانونی طور پر سرحد عبور کرنے کی کوشش کرتے ہوئے حراست میں لیا گیا تھا۔

Facebook Comments Box