ہنگری نے ازبکستان کو فضائی پروازوں کیلئے ’ففتھ فریڈم‘ اجازت دے دی
تاشقند (صداۓ روس)
ازبکستان کو یورپ اور امریکہ تک فضائی رسائی کی اجازت — ہنگری کی جانب سے ’پانچویں فضائی آزادی‘ کا تاریخی اقدام.. ازبکستان اور ہنگری کے درمیان نقل و حمل اور فضائی روابط کے شعبے میں تاریخی پیش رفت ہوئی ہے۔ ازبکستان کے نائب وزیرِ ٹرانسپورٹ جناب جاسربیک چوریف نے قومی ٹیلی وژن چینل پر بات کرتے ہوئے انکشاف کیا کہ ہنگری نے ازبکستان کو ’’پانچویں فضائی آزادی‘‘ کی سہولت دے دی ہے، جس کے تحت اب ازبک فضائی کمپنیاں ہنگری سے آگے یورپ اور امریکہ کے شہروں تک پروازیں چلا سکیں گی۔
نائب وزیر کا کہنا تھا کہ یہ اجازت نہ صرف ازبک شہریوں کے لیے بین الاقوامی سفر کو آسان بنائے گی بلکہ یورپی ممالک سے آنے والے سیاحوں کے لیے بھی ازبکستان تک براہِ راست رسائی ممکن ہو جائے گی۔ ان کے بقول، اس نئے فضائی منصوبے کے تکنیکی پہلوؤں کو مکمل کرنے کے لیے ضروری دستاویزات کی تیاری آخری مراحل میں ہے اور توقع ہے کہ آئندہ ایک ماہ میں تمام ضابطے مکمل کر لیے جائیں گے۔
گزشتہ برس تاشقند اور بوداپیسٹ کے درمیان براہِ راست پروازوں کا آغاز ہوا تھا، جو ازبک فضائی کمپنی ’’قنوت شرق‘‘ چلا رہی ہے۔ اب ہنگری کی معروف فضائی کمپنیاں بھی اس فضائی روٹ میں دلچسپی لے رہی ہیں، جن میں ’’ویز ایئر‘‘ اور ’’ہنگری ایئر لائنز‘‘ شامل ہیں۔ ازبک فضائی کمپنیاں چاہتی ہیں کہ وہ ہنگری سے نہ صرف نیویارک بلکہ یورپ کے دیگر شہروں تک بھی پروازوں کا آغاز کریں۔ نقل و حمل کے اس بڑھتے ہوئے تعاون میں صرف مسافر پروازیں ہی شامل نہیں، بلکہ دونوں ممالک کے درمیان فضائی کارگو سروسز کے آغاز پر بھی بات چیت جاری ہے۔ نائب وزیر نے امید ظاہر کی کہ موسمِ سرما سے قبل اس ضمن میں باضابطہ معاہدہ طے پا جائے گا۔
اس موقع پر نائب وزیر نے اس امر پر زور دیا کہ ہنگری کے سرمایہ کار ازبکستان میں لاجسٹکس کے شعبے میں بھی دلچسپی لے رہے ہیں۔ خاص طور پر ’’وسطی راہداری‘‘ یعنی ترانس-کاسپین راہداری کے پس منظر میں ازبکستان کی جغرافیائی اہمیت بڑھ رہی ہے، اور ہنگری جیسے یورپی ممالک اس علاقے میں اپنے اقتصادی اثر و رسوخ کو بڑھانے کے خواہاں ہیں۔ چین، کرغزستان اور ازبکستان کو ملانے والے مجوزہ ریلوے منصوبے کا حوالہ دیتے ہوئے نائب وزیر نے کہا کہ اس منصوبے کی تکمیل سے ازبکستان پورے وسطی ایشیا کے ریلوے نیٹ ورک کا مرکز بن جائے گا۔ اس سے نہ صرف علاقائی تجارت کو فروغ ملے گا بلکہ یورپ اور ایشیا کے درمیان سامان کی ترسیل میں بھی انقلابی تبدیلی آئے گی۔
نائب وزیر نے یہ بھی بتایا کہ دونوں ممالک ہوابازی اور نقل و حمل کے شعبوں میں مشترکہ منصوبے شروع کرنے پر غور کر رہے ہیں۔ ہنگری کی ٹیکنالوجی اور مہارت سے فائدہ اٹھاتے ہوئے ازبکستان میں نہ صرف پرزہ جات کی پیداوار ہوگی بلکہ ان کی برآمد بھی ممکن ہو سکے گی۔
یہ پیش رفت ازبکستان کو یورپ، امریکہ اور دیگر خطوں سے جوڑنے والے اہم فضائی اور زمینی راستوں میں مرکزی کردار ادا کرنے کے قابل بنا دے گی، اور علاقائی سطح پر ملک کے اقتصادی و تجارتی مفادات کو نئی جہت عطا کرے گی۔
