بھارت میں ہاتھی بپھرگئے، مذہبی جلوس میں بھگدڑ، متعدد افراد زخمی
ماسکو (انٹرنیشنل ڈیسک)
بھارتی ریاست گجرات کے شہر احمد آباد میں جمعے کی صبح اُس وقت خوف و ہراس پھیل گیا جب معروف مذہبی تہوار “جگن ناتھ رتھ یاترا” کے دوران شریک ہاتھیوں کا ایک گروہ بے قابو ہو گیا اور راستے میں موجود افراد کو روند ڈالا۔ مقامی میڈیا کے مطابق اس واقعے میں کم از کم دو افراد زخمی ہوئے جبکہ سینکڑوں لوگوں کو جان بچانے کے لیے تنگ گلیوں میں بھاگنا پڑا۔
یہ واقعہ صبح 10 بج کر 15 منٹ پر احمد آباد کے گنجان آباد علاقے “کھاڈیا” میں پیش آیا، جہاں ہزاروں لوگ جلوس کے آغاز کے لیے موجود تھے۔ رپورٹ کے مطابق ایک سجا ہوا ہاتھی اچانک اپنے گروپ سے الگ ہو کر بے قابو ہو گیا، جس کے بعد ایک یا دو مزید ہاتھیوں نے اس کی پیروی کی۔ ہاتھیوں کی اچانک حرکت سے لوگوں میں شدید خوف و ہراس پھیل گیا، اور جلوس عارضی طور پر رک گیا۔
مقامی میڈیا پر نشر ہونے والی ویڈیوز میں واضح طور پر دیکھا جا سکتا ہے کہ ہاتھیوں کے مہاوت (نگہبان) جانوروں کو قابو میں رکھنے کی کوشش کر رہے ہیں، جبکہ لوگ تنگ گلیوں میں جان بچانے کے لیے اِدھر اُدھر دوڑ رہے ہیں۔ ایک ہاتھی کو لوگوں کی طرف دوڑتے ہوئے بھی دیکھا گیا، جس سے مجمع خوفزدہ ہو کر مختلف سمتوں میں بکھر گیا۔
احمد آباد پولیس نے صبح 10 بج کر 28 منٹ پر بیان جاری کرتے ہوئے تصدیق کی کہ ہاتھیوں کو جلوس سے خارج کر دیا گیا ہے اور “رتھ یاترا” طے شدہ شیڈول کے مطابق دوبارہ شروع ہو گئی ہے۔ پولیس نے سوشل میڈیا پلیٹ فارم ایکس” پر لکھا کھاڈیا علاقے میں ہاتھیوں کے بے قابو ہونے کے بعد، انہیں رتھ یاترا سے الگ کر دیا گیا ہے اور جلوس معمول کے مطابق جاری ہے۔ کملہ نہرو چڑیا گھر کے سپرنٹنڈنٹ آر کے ساہو نے ٹائمز آف انڈیا کو بتایا کہ ہاتھی کو فوری طور پر بے ہوش کرنے کا انجیکشن دیا گیا۔ ان کے مطابق ہمارے حفاظتی پروٹوکول کے تحت دو مادہ ہاتھیوں کی مدد سے متاثرہ ہاتھی کو ہجوم سے دور لے جایا گیا۔
جگن ناتھ رتھ یاترا بھارت کے بڑے مذہبی تہواروں میں شمار ہوتی ہے، جو ہر سال بھگوان جگن ناتھ، ان کے بھائی بل بھدرا اور بہن سبھدرا کی رتھ سواری کے طور پر منائی جاتی ہے۔ عقیدت مندوں کا ماننا ہے کہ ان رتھوں کو کھینچنے یا دیکھنے سے گناہوں کا کفارہ ادا ہوتا ہے اور روحانی سکون و برکت حاصل ہوتی ہے۔ احمد آباد میں اس یاترا کا راستہ 11.2 میل پر محیط ہوتا ہے، جو پرانے شہر کے کئی اہم علاقوں جیسے جمال پور، کھاڈیا، کالی پور، سارسپور، دریہ پور، شاہپور، اور مانک چوک سے گزرتا ہے۔
اس سال کی رتھ یاترا میں تقریباً 17 ہاتھی، 100 سے زائد فلوٹس اور دس لاکھ سے زیادہ افراد شریک تھے۔ حادثے کے باوجود جلوس کو جلد ہی دوبارہ بحال کر دیا گیا، تاہم واقعے نے ہاتھیوں کے استعمال اور مذہبی تقریبات میں جانوروں کی شمولیت کے حوالے سے سیکیورٹی خدشات کو مزید اجاگر کر دیا ہے۔
