بھارتی اداکار جسوندر سنگھ بھلا چل بسے، فلم انڈسٹری سوگوار
ماسکو (انٹرنیشنل ڈیسک)
بھارتی پنجابی فلموں کے مشہور و مقبول کامیڈین اور اداکار جسوندر سنگھ بھلا 65 برس کی عمر میں انتقال کر گئے۔ بھارتی میڈیا رپورٹس کے مطابق جسوندر سنگھ بھلا کو برین اسٹروک کے باعث اسپتال منتقل کیا گیا تھا، جہاں وہ جمعہ کی صبح موہالی میں چل بسے۔ ان کے اہلِ خانہ نے بھی اس المناک خبر کی تصدیق کرتے ہوئے بتایا کہ اداکار کی آخری رسومات 23 اگست بروز ہفتہ دوپہر 12 بجے موہالی میں ادا کی جائیں گی، جس میں پنجابی فلم انڈسٹری کی نامور شخصیات کی شرکت متوقع ہے۔ جسوندر سنگھ بھلا کے انتقال پر فلم انڈسٹری گہرے صدمے سے دوچار ہے۔ ان کے ساتھی فنکاروں اور مداحوں نے کہا کہ ان کے جانے سے پنجابی سینما ایک بڑے فنکار سے محروم ہوگیا ہے، جنہوں نے اپنے منفرد انداز سے کامیڈی کو نئی پہچان دی۔
بھارتی سیاسی رہنماؤں اور فلم انڈسٹری کے بڑے ناموں نے جسوندر سنگھ بھلا کی موت پر گہرے دکھ کا اظہار کرتے ہوئے اہلِ خانہ سے تعزیت کی ہے۔ واضح رہے کہ جسوندر سنگھ بھلا نے اپنے فنی سفر کا آغاز 1988 میں کامیڈی البم ’چھنکاتا 88‘ سے کیا تھا۔ انہوں نے درجنوں سپر ہٹ پنجابی فلموں میں یادگار کردار ادا کیے۔ ان کی مشہور فلموں میں کیری آن جٹا، بھاجی ان پرابلم، منجھے بسسراں دے، سجن سنگھ رنگروٹ اور جٹ اینڈ جولیٹ شامل ہیں۔
