پہلا ٹیسٹ: پاکستان 378 رنز پر آؤٹ، جنوبی افریقا کی بیٹنگ جاری
اسلام آباد (صداۓ روس)
قذافی اسٹیڈیم لاہور میں پاکستان اور جنوبی افریقا کے درمیان پہلے ٹیسٹ میچ کے دوسرے روز کا کھیل جاری ہے۔ جنوبی افریقا نے اپنی پہلی اننگز میں 28 اوورز میں 2 وکٹوں کے نقصان پر 91 رنز بنا لیے ہیں۔ پروٹیز کی پہلی وکٹ 45 کے مجموعی اسکور پر گری جب ایڈن مارکرم 20 رنز بنا کر نعمان علی کی گیند پر کیچ آؤٹ ہوئے، دوسری وکٹ 80 رنز پر گری جب ویان ملڈر 17 رنز بنا کر آؤٹ ہوئے۔ اس وقت ریان ریکلٹن اور ٹونی ڈی زورزی کریز پر موجود ہیں۔
اس سے قبل پاکستان کی ٹیم اپنی پہلی اننگز میں 378 رنز بنا کر آؤٹ ہوگئی۔ جنوبی افریقی اسپنر سینوران متھوسامی نے تباہ کن بولنگ کا مظاہرہ کرتے ہوئے میچ میں مجموعی طور پر 6 وکٹیں حاصل کیں۔ دوسرے روز کے پہلے ہی سیشن میں انہوں نے پاکستانی بیٹنگ لائن کو ہلا کر رکھ دیا۔ میچ کے 102 ویں اوور میں متھوسامی نے ایک ہی اوور میں تین کھلاڑیوں کو آؤٹ کیا — تیسری گیند پر محمد رضوان 75 رنز بنا کر کیچ آؤٹ ہوئے، پانچویں گیند پر نعمان علی بغیر کوئی رن بنائے بولڈ ہوگئے، جبکہ چھٹی گیند پر ساجد خان بھی صفر پر کیچ آؤٹ ہوگئے۔ 
سلمان علی آغا نے شاندار بیٹنگ کرتے ہوئے 93 رنز بنائے مگر وہ بھی سبرائن کی گیند پر متھوسامی کے ہاتھوں کیچ آؤٹ ہوئے۔ شاہین شاہ آفریدی 7 رنز بنا کر متھوسامی کا شکار بنے۔ جنوبی افریقا کی جانب سے پرینیلن سبرائن نے 2، جبکہ کاگیسو ربادا اور سیمون ہارمر نے ایک ایک وکٹ حاصل کی۔
پاکستان نے دوسرے دن کا آغاز 313 رنز 5 وکٹوں کے نقصان پر کیا۔ کریز پر موجود محمد رضوان 62 اور سلمان علی آغا 52 رنز سے اننگز آگے بڑھانے آئے تھے۔
اس سے قبل پاکستان کے کپتان شان مسعود نے ٹاس جیت کر پہلے بیٹنگ کا فیصلہ کیا تھا۔ ابتدائی بلے باز عبداللہ شفیق صرف 2 رنز بنا کر کاگیسو ربادا کا شکار بن گئے۔ تاہم امام الحق اور شان مسعود نے 161 رنز کی شاندار شراکت قائم کی۔ شان مسعود 76 رنز بنا کر آؤٹ ہوئے جبکہ امام الحق 93 رنز پر کیچ آؤٹ ہو کر سنچری سے محروم رہ گئے۔ سعود شکیل پہلی ہی گیند پر پویلین لوٹ گئے اور بابر اعظم 23 رنز بنا کر آؤٹ ہوئے۔
