جنوبی افریقہ نے پاکستان کو 8 وکٹوں سے شکست دے کر سیریز برابر کردی
اسلام آباد (صداۓ روس)
فیصل آباد کے اقبال کرکٹ اسٹیڈیم میں کھیلے گئے دوسرے ایک روزہ میچ میں جنوبی افریقہ نے کوئنٹن ڈی کوک کی شاندار سنچری کی بدولت پاکستان کو 8 وکٹوں سے شکست دے کر تین میچوں کی سیریز ایک، ایک سے برابر کر دی۔ پاکستان نے ٹاس جیت کر پہلے بیٹنگ کرتے ہوئے 50 اوورز میں 9 وکٹوں کے نقصان پر 269 رنز بنائے، جس کے جواب میں جنوبی افریقہ نے 41ویں اوور کی پہلی گیند پر ہدف حاصل کرلیا۔ جنوبی افریقا کی جانب سے کوئنٹن ڈی کوک نے ناقابلِ شکست 123 رنز کی شاندار اننگز کھیلی، جس میں 8 چوکے اور 7 چھکے شامل تھے۔ ان کے ساتھ ٹونی ڈی زوری نے 76 اور لوان-ڈرے پریٹوریئس نے 46 رنز بنائے۔ پاکستان کی جانب سے محمد وسیم جونیئر اور فہیم اشرف نے ایک، ایک وکٹ حاصل کی۔
پاکستان کی اننگز میں سلمان آغا، صائم ایوب اور محمد نواز نمایاں رہے۔ سلمان آغا نے 106 گیندوں پر 69 رنز بنائے، صائم ایوب نے 53 رنز کی اننگز کھیلی، جبکہ محمد نواز نے 59 گیندوں پر 59 رنز اسکور کیے، جن میں 4 چھکے اور 3 چوکے شامل تھے۔ جنوبی افریقہ کے بولرز میں ناندرے برگر نے چار اور پیٹر نے تین وکٹیں حاصل کیں۔
پاکستان کی ٹیم میں دو تبدیلیاں کی گئیں — حسن نواز اور ابرار احمد کو ڈراپ کر کے فہیم اشرف اور وسیم جونیئر کو شامل کیا گیا۔ جنوبی افریقہ نے بھی اپنی ٹیم میں دو تبدیلیاں کیں۔ یاد رہے کہ سیریز کے پہلے میچ میں پاکستان نے جنوبی افریقا کو شکست دی تھی، جب کہ فیصلہ کن تیسرا میچ 8 نومبر کو اقبال اسٹیڈیم فیصل آباد میں کھیلا جائے گا۔ 
