بھارت کو اپنے گھر میں شکست، جنوبی افریقہ نے 25 سال بعد ٹیسٹ سیریز جیت لی
ماسکو(انٹرنیشنل ڈیسک)
بھارت کو ایک بار پھر اپنی ہی سرزمین پر شکست کا سامنا کرنا پڑا ہے، جہاں جنوبی افریقہ نے دوسرے ٹیسٹ میچ میں شاندار کارکردگی کا مظاہرہ کرتے ہوئے نہ صرف 408 رنز سے کامیابی حاصل کی بلکہ 25 سال بعد ہندوستان میں ٹیسٹ سیریز جیتنے کا اعزاز بھی حاصل کر لیا۔ اس سے قبل پروٹیز نے سن 2000 میں بھارت کو اس کے گھر میں سیریز میں شکست دی تھی۔
دوسرے ٹیسٹ میچ میں جنوبی افریقہ کی جانب سے دیے گئے 549 رنز کے ہدف کے تعاقب میں بھارتی ٹیم مکمل طور پر ناکام رہی اور صرف 140 رنز پر ڈھیر ہوگئی۔ بھارتی بلے بازوں کی ناکامی اس قدر نمایاں تھی کہ پوری ٹیم میدان میں بے بس نظر آئی۔ اس سے قبل مہمان ٹیم نے پہلی اننگز میں 489 رنز اسکور کیے تھے، جس میں سینورن متھوسامی نے شاندار 109 رنز کی اننگز کھیلی جبکہ مارکو یانسن نے 93 رنز بنا کر ان کا بھرپور ساتھ دیا۔ دوسری جانب بھارت پہلی اننگز میں صرف 201 رنز پر پویلین لوٹ گئی۔ فالو آن کے باوجود جنوبی افریقہ نے بیٹنگ جاری رکھی اور 5 وکٹوں کے نقصان پر 260 رنز بنا کر اننگز ڈکلیئر کی۔ واضح رہے کہ پہلے ٹیسٹ میچ میں بھی جنوبی افریقہ نے بھارت کو 30 رنز سے شکست دی تھی، یوں دو میچوں پر مشتمل سیریز میں پروٹیز نے 0-2 سے کلین سوئپ کرتے ہوئے تاریخی کامیابی حاصل کی۔ 
