انڈر 19 ایشیا کپ فائنل: بھارت کو عبرتناک شکست، ٹائٹل پاکستان کے نام
اسلام آباد (صداۓ روس)
دبئی میں کھیلے گئے انڈر 19 ایشیا کپ کے فائنل میں پاکستان انڈر 19 ٹیم نے شاندار کارکردگی کا مظاہرہ کرتے ہوئے بھارت انڈر 19 ٹیم کو 191 رنز سے شکست دے کر ٹائٹل اپنے نام کر لیا۔ اس جیت کے ساتھ پاکستان نے دوسری مرتبہ انڈر 19 ایشیا کپ میں کامیابی حاصل کی، جبکہ اس سے قبل 2012 کے ایونٹ میں پاکستان اور بھارت مشترکہ چیمپئن قرار پائے تھے۔ اے سی سی انڈر 19 ایشیا کپ کے فائنل میں بھارت نے ٹاس جیت کر پہلے فیلڈنگ کا فیصلہ کیا، تاہم پاکستانی بیٹنگ لائن نے ابتدا ہی سے بھارتی بولرز پر دباؤ برقرار رکھا۔ پاکستان نے مقررہ اوورز میں 8 وکٹوں کے نقصان پر 347 رنز کا بڑا مجموعہ اسکور بورڈ پر سجا دیا۔ پاکستان کی جانب سے اوپنر سمیر منہاس نے غیر معمولی بیٹنگ کرتے ہوئے فائنل کو یکطرفہ بنا دیا۔ سمیر منہاس نے 113 گیندوں پر 17 چوکوں اور 9 چھکوں کی مدد سے 172 رنز کی شاندار اننگ کھیلی۔ ان کے علاوہ احمد حسین نے 56، عثمان خان نے 35، کپتان فرحان یوسف نے 19 اور حمزہ ظہور نے 18 رنز اسکور کیے۔ 348 رنز کے ہدف کے تعاقب میں بھارتی انڈر 19 ٹیم آغاز سے ہی دباؤ کا شکار رہی اور پوری بیٹنگ لائن پاکستانی بولنگ کے سامنے مکمل طور پر لڑکھڑا گئی۔ بھارتی ٹیم 156 رنز پر آل آؤٹ ہو گئی۔ بھارت کی جانب سے دیوندرن 36 اور سوریا ونشی 26 رنز کے ساتھ نمایاں رہے، تاہم مڈل اور لوئر آرڈر مکمل طور پر ناکام ثابت ہوا۔
پاکستانی بولرز نے فائنل میں شاندار کارکردگی دکھائی۔ علی رضا نے 4 وکٹیں حاصل کیں، جبکہ عبدل سبحان، محمد صیام اور حذیفہ حسن نے 2، 2 کھلاڑیوں کو پویلین کی راہ دکھا کر ٹیم کی تاریخی فتح میں کلیدی کردار ادا کیا۔ میچ کے دوران ایک بار پھر پاک بھارت مقابلے میں ٹاس کے موقع پر کپتانوں کے درمیان ہینڈ شیک نہیں ہوا، جبکہ ٹرافی کے ساتھ تصویر بنواتے وقت بھی رسمی مصافحہ دیکھنے میں نہیں آیا۔ فائنل سے قبل پاکستانی کپتان فرحان یوسف کا کہنا تھا کہ ٹیم مکمل طور پر تیار ہے، بھرپور فائٹ کرے گی اور ٹائٹل جیتنے کی پوری کوشش کرے گی، جو بالآخر حقیقت بن گئی۔ واضح رہے کہ پاکستان اس سے قبل دو مرتبہ انڈر 19 ورلڈ کپ کا ٹائٹل جیت چکا ہے، تاہم انڈر 19 ایشیا کپ میں یہ پاکستان کی فیصلہ کن اور یادگار فتح قرار دی جا رہی ہے۔ 
