پاکستان غزہ امن بورڈ کا حصہ، ٹرمپ کی دعوت قبول
اسلام آباد (صداۓ روس)
پاکستان نے غزہ میں پائیدار امن کے قیام کے لیے بورڈ آف پیس میں شمولیت کی امریکی صدر ڈونلڈ ٹرمپ کی دعوت قبول کر لی ہے۔ بدھ کے روز دفترِ خارجہ سے جاری بیان کے مطابق پاکستان نے سلامتی کونسل کی قرارداد 2803 کے فریم ورک کے تحت غزہ امن منصوبے پر عمل درآمد کی حمایت کے لیے بورڈ آف پیس میں شمولیت اختیار کرنے کا اعلان کیا ہے۔ دفترِ خارجہ کے بیان میں امید ظاہر کی گئی ہے کہ اس اقدام کے نتیجے میں غزہ میں مستقل جنگ بندی کے نفاذ، فلسطینی عوام کے لیے انسانی امداد میں خاطر خواہ اضافے اور علاقے کی تعمیرِ نو کے لیے عملی اقدامات ممکن ہو سکیں گے۔ بیان کے مطابق پاکستان بورڈ آف پیس کے رکن کی حیثیت سے ان اہداف کے حصول اور فلسطینی عوام کی مشکلات کے خاتمے کے لیے اپنا تعمیری کردار جاری رکھے گا۔
پاکستان نے اس عزم کا بھی اعادہ کیا کہ یہ تمام کوششیں فلسطینی عوام کے حقِ خود ارادیت کے احترام کے ساتھ ہونی چاہئیں، جو بین الاقوامی اصولوں اور اقوامِ متحدہ کی متعلقہ قراردادوں سے ہم آہنگ ہوں، اور ایک قابلِ اعتماد، بامقصد اور مقررہ مدت کے سیاسی عمل کے ذریعے آگے بڑھائی جائیں۔ 
