لاہور میں بسنت کے موقع پر شہریوں کے لیے مفت ٹرانسپورٹ کا منصوبہ
اسلام آباد (صداۓ روس)
لاہور میں بسنت کے موقع پر شہریوں کو سہولت فراہم کرنے کے لیے مفت پبلک ٹرانسپورٹ کے منصوبے کو حتمی شکل دے دی گئی ہے۔ پنجاب ماس ٹرانزٹ اتھارٹی، پنجاب ٹرانسپورٹ کمپنی اور نجی رائیڈر کمپنیاں مشترکہ طور پر شہر بھر میں شہریوں کو میٹروبس، اورنج لائن میٹرو ٹرین اور بسوں کے ذریعے بلا معاوضہ سفر کی سہولت فراہم کریں گی۔ منصوبے کے تحت لاہور کے 24 مختلف روٹس پر مفت ٹرانسپورٹ دستیاب ہوگی۔ ان روٹس پر فیڈر سروس کے لیے 228 بسیں، میٹروبس سروس کی 64 بسیں شامل ہوں گی۔ اس کے علاوہ مختلف سرکاری کالجز سے 54 بسیں اور جامعات سے 73 بسیں بھی شہریوں کی سہولت کے لیے چلائی جائیں گی۔
اورنج لائن میٹرو ٹرین کے ذریعے یومیہ تقریباً 2 لاکھ 50 ہزار مسافر مفت سفر کر سکیں گے، جبکہ میٹروبس سروس سے 87 ہزار افراد مستفید ہوں گے۔ رانا ٹاؤن ٹریل وے اسٹیشن سے بھی 13 بسیں آپریشن میں ہوں گی تاکہ مختلف علاقوں تک رسائی کو مزید بہتر بنایا جا سکے۔ انتظامیہ کے مطابق بسنت کے دنوں میں مجموعی طور پر یومیہ تقریباً 5 لاکھ 16 ہزار شہریوں کو مفت ٹرانسپورٹ کی سہولت فراہم کی جائے گی، جس کا مقصد شہریوں کو محفوظ، آسان اور سستی سفری سہولت مہیا کرنا اور انہیں تفریحی و سماجی سرگرمیوں میں بلا رکاوٹ شرکت کا موقع دینا ہے۔ 
