ایرانی صدر نے امریکا اور اسرائیل کے خلاف کشیدگی میں روس سے حمایت مانگ لی
ماسکو(انٹرنیشنل ڈیسک)
ایرانی صدر مسعود پزشکیان نے روس سے مطالبہ کیا ہے کہ وہ جاری امریکی اور اسرائیلی حملوں کے تناظر میں اسلامی جمہوریہ ایران کو بین الاقوامی سطح پر حمایت فراہم کرے۔ ایرانی رہنما نے یہ بیان 7 مارچ کو روسی صدر ولادیمیر پوتن سے ٹیلی فونک گفتگو کے دوران دیا۔ ایرانی صدارتی پریس سروس کے ٹیلی گرام چینل کے مطابق پزشکیان نے کہا کہ “ایران توقع کرتا ہے کہ روس اپنے بین الاقوامی اثرو رسوخ کا استعمال کرتے ہوئے موجودہ حملوں کے سامنے ایرانی عوام کے جائز حقوق کی حمایت کرے گا۔”
اسلامی جمہوریہ کے سربراہ نے مشرق وسطیٰ میں پیش آنے والے واقعات پر تشویش کے اظہار پر روسی عوام کا بھی شکریہ ادا کیا۔
اسی دن 7 مارچ کو ایرانی مسلح افواج کے جنرل اسٹاف کے آفیشل ترجمان ابوالفضل شیخ آرکی نے بیان دیا کہ امریکہ نے ایران کے خلاف وہ ہتھیار استعمال کیے جو “تھرڈ ورلڈ وار” کے لیے ذخیرہ کیے گئے تھے۔ اس سے دو دن قبل پولیٹیکو نے رپورٹ کیا تھا کہ امریکہ ایران کے خلاف فوجی کارروائی کم از کم 100 دن تک جاری رکھنے کا ارادہ رکھتا ہے۔ اشاعت کے مطابق امریکی سینٹرل کمانڈ (سینٹ کام) کے نمائندوں نے پینٹاگون کی قیادت سے اضافی فوجی انٹیلی جنس افسران بھیجنے کا مطالبہ کیا ہے جنہیں اس سال ستمبر تک تعینات کرنے کا منصوبہ ہے۔
