ماسکو(انٹرنیشنل ڈیسک)
ڈھاکا میں کھیلے گئے دوسرے ایک روزہ بین الاقوامی میچ میں پاکستان نے بنگلادیش کو 128 رنز سے شکست دے دی ہے۔ بارش کی وجہ سے متاثرہ اس میچ کا فیصلہ ڈک ورتھ لوئیس میتھڈ کے تحت ہوا، جس کے نتیجے میں تین میچوں کی سیریز 1-1 سے برابر ہوگئی ہے۔ پاکستان نے ٹاس ہارنے کے بعد پہلے بیٹنگ کرتے ہوئے مقررہ 50 اوورز میں 274 رنز بنائے۔ اننگز میں معاذ صداقت نے 75 رنز کی شاندار اننگز کھیلی جبکہ سلمان علی آغا نے 64 اور محمد رضوان نے 44 رنز کا مفید حصہ ڈالا۔ بنگلادیش کی جانب سے رشاد حسین اور مہدی حسن نے تین تین وکٹیں حاصل کیں۔
جواب میں بنگلادیش کو بارش کی وجہ سے ہدف کم کرکے 32 اوورز میں 243 رنز کا کردیا گیا تھا، لیکن میزبان ٹیم صرف 114 رنز پر آل آؤٹ ہوگئی۔ پاکستان کی بولنگ میں معاذ صداقت اور حارث رؤف نے تین تین وکٹیں حاصل کیں جبکہ شاہین شاہ آفریدی نے دو، محمد وسیم جونیئر اور فہیم اشرف نے ایک ایک وکٹ لی۔ آل راؤنڈ پرفارمنس کے باعث معاذ صداقت کو میچ کا بہترین کھلاڑی قرار دیا گیا۔
ٹاس کے موقع پر بنگلادیش کے کپتان مہدی حسن نے کہا تھا کہ وہ پہلے میچ کی کامیابی کے فارمولے کو برقرار رکھنا چاہتے ہیں اس لیے پہلے بولنگ کا فیصلہ کیا گیا۔ انہوں نے بتایا کہ ٹیم میں کوئی تبدیلی نہیں کی گئی اور وہی کھلاڑی میدان میں اترے جو پہلے میچ میں کامیاب رہے تھے۔
دوسری جانب پاکستان کے کپتان شاہین شاہ آفریدی نے کہا کہ بلے بازوں کو اپنی غلطیوں کا احساس ہے اور وہ اس میچ میں بہتر کارکردگی دکھانے کی کوشش کریں گے۔ انہوں نے بتایا کہ ٹیم میں ایک تبدیلی کی گئی ہے، اسپنر ابرار احمد کی جگہ فاسٹ بولر حارث رؤف کو پلیئنگ الیون میں شامل کیا گیا۔ یاد رہے کہ پہلے میچ میں پاکستان کو 8 وکٹوں سے شکست کا سامنا کرنا پڑا تھا۔
سیریز کا تیسرا اور فیصلہ کن میچ اتوار کو کھیلا جائے گا۔
