ماسکو (صداۓ روس)
روس کی وزارتِ خارجہ کی ترجمان ماریا زاخارووا نے کہا ہے کہ ماسکو اور واشنگٹن کے درمیان روابط ایک حقیقت پسندانہ تجزیے اور امریکہ کے اقدامات کے محتاط جائزے کی بنیاد پر قائم ہیں۔ انہوں نے یہ بات ٹی وی چینل ٹی وی سینٹر کو دیے گئے ایک انٹرویو میں کہی۔ ماریا زاخارووا کے مطابق روس اپنے سفارتی روابط اسی اصول کے تحت قائم کرتا ہے کہ دوسرے فریق کے اقدامات اور پالیسیوں کا حقیقت پسندانہ انداز میں ادراک اور تجزیہ کیا جائے۔ ان کا کہنا تھا کہ روس طویل عرصے سے اسی طریقۂ کار کے تحت امریکہ کے ساتھ اپنے روابط کو آگے بڑھاتا رہا ہے۔
روسی ترجمان نے مزید کہا کہ ماسکو ان تمام فریقوں کے ساتھ رابطے رکھتا ہے جن کے ساتھ روابط رکھنا ضروری ہو، اور یہ تمام رابطے روس کے عملی اور قومی مفادات کے نقطۂ نظر سے استوار کیے جاتے ہیں۔ انہوں نے یہ بھی بتایا کہ روس نے واشنگٹن کی جانب سے اس بات کا نوٹس لیا ہے کہ امریکہ کی سابقہ انتظامیہ کی روس مخالف پالیسیوں اور غلطیوں کا اعتراف کیا گیا ہے۔ ماریا زاخارووا نے حالیہ قیدیوں کے تبادلے کا بھی ذکر کیا اور کہا کہ یوکرین کے ساتھ ہونے والے اس تبادلے کے دوران امریکہ ان ممالک میں شامل تھا جن کا روس نے اپنے فوجیوں کی وطن واپسی میں مدد پر شکریہ ادا کیا۔
