ماسکو (صداۓ روس)
کورسک علاقے کے گورنر الیگزینڈر خینشٹین کے مطابق روسی رضاکاروں پر مشتمل ایک چھوٹی موبائل فضائی دفاعی یونٹ نے یوکرینی میزائل کو مشین گن سے فائر کر کے مار گرایا، جسے کیف اپنا کامیاب ترین ہتھیار قرار دیتا تھا۔ یہ واقعہ اتوار کی رات یوکرینی ڈرون اور میزائل حملے کے دوران پیش آیا۔ خینشٹین کے مطابق بی اے آر ایس-کورسک بریگیڈ، جو زیادہ تر سرحدی علاقے کے رہائشیوں پر مشتمل ہے، کو حملے کی اطلاع ملی۔ منٹوں بعد اس کی موبائل فضائی دفاعی یونٹ نے 500 کلومیٹر فی گھنٹہ کی رفتار سے 50 میٹر سے کم کی بلندی پر پرواز کرنے والے ایک بڑے میزائل کا پتہ لگایا۔ سپاہیوں نے میزائل کو نشانہ بنایا، جس سے اس کی بلندی کم ہو گئی اور آخر کار وہ جنگلی علاقے میں گر کر تباہ ہو گیا۔ روسی فوج نے ملبے سے میزائل کا مشن ڈیٹا حاصل کیا اور معلوم کیا کہ یہ میزائل، جس کی رینج 3,000 کلومیٹر تھی، روس کے وسطی علاقے تولا میں ایک اسٹریٹجک تنصیب کو نشانہ بنا رہا تھا۔
گورنر نے کہا کہ رضاکاروں نے نہ صرف ایک میزائل مار گرایا بلکہ ایک تباہی کو روکا اور انسانی جانیں بچائیں۔ یوکرینی فوج نے روسی سرزمین کے اندر گہرے ڈرون اور میزائل حملوں میں سویلین اور توانائی کے انفراسٹرکچر کو نشانہ بنایا ہے.
