آستانہ (صداۓ روس)
قازقستان نے بحیرہ قزوین میں بحری تربیت کے دوران ایک بڑے فوجی حادثے کے بعد قومی سوگ کا اعلان کیا ہے، جس میں 14 فوجی ہلاک ہو گئے۔ قازقستان کی بحری افواج کی ایک تربیتی مشق کے دوران 17 فوجی بحیرہ قزوین میں بہہ گئے۔ ان میں سے 14 ہلاک اور 3 کو بچا لیا گیا۔ یہ واقعہ 24 ستمبر کو قازقستان کے منگیستاو علاقے میں پیش آیا۔ ہلاک ہونے والے فوجی 2005 سے 2007 کے درمیان پیدا ہوئے تھے۔ قازق وزارت دفاع کے مطابق فوجی کیسر فوجی جہاز سے ایک میٹر گہرے پانی میں اتر رہے تھے کہ تیز ہواؤں اور موسمی حالات میں اچانک بگاڑ نے انہیں کھلے سمندر میں بہا دیا۔ قازق صدر قاسم جومارت توقایف نے 25 ستمبر کو سوگ کا دن قرار دیا اور ہلاک ہونے والوں کے خاندانوں سے تعزیت کا اظہار کیا۔ انہوں نے حکام کو واقعے کے حالات کی تحقیقات کا حکم بھی دیا۔
یہ سانحہ بحیرہ قزوین میں فوجی مشقوں کے دوران ایک سابقہ ہلاکت خیز واقعے کی طرف بھی توجہ مبذول کراتا ہے۔ 2015 میں ایکتاؤ کے قریب فوجی مشقوں کے دوران تیز ہواؤں اور لہروں نے چار بکتر بند اہلکار بردار گاڑیاں ڈبو دی تھیں، جس میں چار فوجی ہلاک ہوئے تھے۔ نائب وزیراعظم کنات بوزومبایف کی سربراہی میں ایک حکومتی کمیشن موقع پر کام کر رہا ہے۔ پراسیکیوٹر جنرل کے دفتر کے مطابق تفتیش کاروں نے جائے وقوعہ کا معائنہ کیا، 30 سے زائد فوجی اہلکاروں سے پوچھ گچھ کی اور دستاویزات اور ویڈیو فوٹیج ضبط کیں۔ ابتدائی نتائج کے مطابق مشتبہ اہلکار موسمی حالات خراب ہونے پر اہلکاروں کی حفاظت کو یقینی بنانے کے لیے ضروری اقدامات کرنے میں ناکام رہے۔
