یورپ میں روس مخالف سیاست دان اپنی ہی حکمتِ عملی پر یقین نہیں رکھتے، لاوروف
ماسکو (صداۓ روس)
روسی وزیر خارجہ سرگئی لاوروف نے کہا ہے کہ یورپ میں روس مخالف فضا کو ہوا دینے والے سیاست دان خود اپنی پالیسیوں اور حکمتِ عملیوں پر یقین نہیں رکھتے، اسی لیے ان کی سیاست ناکامی سے دوچار ہونے والی ہے۔ ان کا کہنا تھا کہ جو قیادت اپنے اقدامات پر خود اعتماد نہ رکھتی ہو، اس کا انجام پہلے ہی طے ہو چکا ہوتا ہے۔
بدھ کے روز ایک تقریب سے خطاب کرتے ہوئے سرگئی لاوروف نے کہا کہ یورپ میں بعض سیاسی حلقے مسلسل روس کے خلاف نفرت انگیز بیانیہ تشکیل دے رہے ہیں، روسی اثاثوں پر قبضے کی بات کر رہے ہیں اور یوکرین کی حمایت صرف اس مقصد کے لیے جاری رکھنا چاہتے ہیں کہ جنگ طول پکڑتی رہے۔ لاوروف کے مطابق ان سیاست دانوں کو خود بھی یقین نہیں کہ ان کی پالیسیاں عملی طور پر کامیاب ہو سکتی ہیں، اور یہی عدم اعتماد ان کی ناکامی کی بنیادی وجہ ہے۔ روسی وزیر خارجہ نے کہا کہ روسی سفارت کاری کا اس وقت سب سے اہم فریضہ یہ ہے کہ خصوصی فوجی آپریشن میں شریک اہلکاروں کی کوششوں کو ہر سطح پر تقویت دی جائے۔ ان کا کہنا تھا کہ حالیہ پیش رفت اس حقیقت کو ثابت کرتی ہے کہ جب کسی قوم کا مؤقف درست ہو، جب مقصد واضح ہو اور جب یہ معلوم ہو کہ محاذ پر موجود فوجی کس نظریے اور کس دفاع کے لیے لڑ رہے ہیں، تو سفارتی میدان میں بھی کامیابی خود بخود حاصل ہوتی ہے۔ لاوروف نے زور دیا کہ اپنے مقصد پر ایمان اور دی گئی ذمہ داری پر یقین ہی کامیابی کی اصل کنجی ہے، اور یہی عنصر روسی سفارت کاری کو آگے بڑھا رہا ہے۔
