اسلام آباد (صداۓ روس)
پاکستان سے ازبکستان کے لیے منجمد گوشت کی پہلی برآمدی کھیپ روانہ کر دی گئی ہے، جس کے ساتھ ہی پاکستان۔ایران زمینی تجارتی راہداری کا باقاعدہ آغاز ہو گیا ہے۔ کسٹمز حکام کے مطابق کراچی سے روانہ ہونے والی یہ کھیپ تاشقند کے لیے بھیجی گئی ہے۔ نئی راہداری کے تحت سامان پہلے گوادر سے ایرانی علاقے رمدان بارڈر پہنچا، جہاں سے یہ ایران کے راستے وسطی ایشیائی ممالک کو منتقل کیا جائے گا۔
اعلامیے کے مطابق اس نئی راہداری کے ذریعے پاکستان سے ایران اور پھر وسطی ایشیا تک ایک مؤثر زمینی تجارتی راستہ قائم ہو گیا ہے۔ یہ نظام TIR نظام کے تحت فعال کیا گیا ہے، جو سرحد پار تجارت کو آسان اور تیز بنانے میں مدد دیتا ہے۔ حکام کا کہنا ہے کہ اس اقدام سے نہ صرف تجارتی سرگرمیوں میں اضافہ ہوگا بلکہ ترسیل کا وقت بھی کم ہوگا، جس سے ملکی صنعت اور برآمدات کو فروغ ملے گا اور علاقائی تجارت کے نئے مواقع پیدا ہوں گے۔
