لاہور میں بوتلوں سے بھرا ٹرک رکشے پر الٹنے سے چار افراد جاں بحق
لاہور (صداۓ روس)
ایم اے او کالج کے قریب خوفناک ٹریفک حادثے میں ایک ہی خاندان کے چار افراد جاں بحق ہو گئے۔ عینی شاہدین کے مطابق بوتلوں سے بھرا ٹرک تیز رفتاری کے باعث بے قابو ہو کر رکشے پر الٹ گیا، جس کے نتیجے میں رکشے میں سوار تمام چار افراد موقع پر ہی دم توڑ گئے۔ ریسکیو 1122 کے مطابق حادثے کی اطلاع ملتے ہی امدادی ٹیمیں موقع پر پہنچ گئیں۔ جاں بحق ہونے والوں میں 67 سالہ شفیق ولد فردوس محمد، 60 سالہ شبانہ زوجہ شفیق، 35 سالہ ساجد ولد شفیق اور 32 سالہ اقرہ زوجہ ساجد شامل ہیں۔ واقعے کا مقدمہ جاں بحق خاتون اقرا کے والد عبدالحفیظ کی مدعیت میں درج کیا گیا ہے۔ ایف آئی آر کے مطابق عبدالحفیظ نے بتایا کہ ان کی بیٹی اقرا اپنے شوہر ساجد، ساس شبانہ اور سسر شفیق کے ساتھ آٹو رکشہ پر سید پور سبزہ زار جا رہی تھی کہ ایم اے او کالج کے اشارے پر ایک تیز رفتار لوڈر مزدا ان کے رکشے پر الٹ گیا۔ عبدالحفیظ نے مقدمے میں الزام لگایا کہ مزدا ڈرائیور کی غفلت اور لاپرواہی کے باعث ان کے خاندان کے چار افراد جاں بحق ہوئے، لہٰذا ذمہ دار کے خلاف قانونی کارروائی کی جائے۔
