ماسکو(انٹرنیشنل ڈیسک)
بھارتی ریفائنریاں ایرانی خام تیل کی ادائیگی چینی کرنسی یوآن میں کر رہی ہیں۔ یہ ادائیگی امریکہ کی عارضی پابندیوں میں رعایت کے بعد ممکن ہوئی ہے، جو واشنگٹن کے مطابق مزید نہیں بڑھائی جائے گی۔ خبر رساں ادارے رائٹرز کے مطابق بھارت کی سب سے بڑی ریفائنری انڈین آئل کارپوریشن نے اپریل میں ایران سے 20 لاکھ بیرل خام تیل خریدا ہے، جو سات سال بعد ایران سے پہلی خریداری ہے۔ اس کی مالیت تقریباً 20 کروڑ ڈالر بتائی جا رہی ہے۔ بھارت نے اپنے سب سے بڑے پرائیویٹ ریفائنر ریلیانس انڈسٹریز کے لیے بھی ایرانی تیل لے جانے والے چار جہازوں کو بندرگاہ پر لگانے کی اجازت دے دی ہے۔ دونوں ٹریڈز کی ادائیگیاں پرائیویٹ بینک ICICI بینک کے ذریعے کی جا رہی ہیں، جو فنڈز کو شنگھائی برانچ کے راستے چینی یوآن میں منتقل کر رہا ہے۔ بھارتی ریفائنریاں پہلے بھی روسی تیل کی ادائیگی یوآن میں کر چکی ہیں۔ رائٹرز کے مطابق 2019 میں امریکی پابندیوں کے سخت ہونے سے پہلے ایرانی تیل بھارت کی کل درآمدات کا 11.5 فیصد حصہ تھا۔ بھارت دنیا کا تیسرا سب سے بڑا تیل درآمد کرنے والا ملک ہے۔
