ماسکو میں رواں موسمِ سرما کی شدید ترین سرد رات ریکارڈ
ماسکو (صداۓ روس)
روسی دارالحکومت ماسکو میں گزشتہ رات رواں موسمِ سرما کی اب تک کی سب سے زیادہ سرد رات ریکارڈ کی گئی ہے۔ فوبوس ویدر سینٹر کے معروف ماہر موسمیات میخائل لیؤس نے اپنے ٹیلیگرام چینل پر بتایا کہ شہر کے مرکزی موسمیاتی اسٹیشن پر درجۂ حرارت منفی اٹھارہ اعشاریہ پانچ ڈگری سینٹی گریڈ تک گر گیا، جو کہ اس سے قبل چوبیس جنوری کو قائم ہونے والے ریکارڈ سے ایک اعشاریہ ایک ڈگری کم ہے۔ میخائل لیؤس کے مطابق ماسکو کے نواحی علاقوں میں سردی کی شدت اس سے بھی زیادہ رہی، جہاں درجۂ حرارت منفی ستائیس اعشاریہ چھ ڈگری سینٹی گریڈ تک پہنچ گیا۔ انہوں نے نشاندہی کی کہ اتوار اور پیر کی درمیانی شب ماسکو ریجن میں شدید ترین سردی دیکھی گئی۔
رپورٹ کے مطابق ماسکو ریجن کے قصبے چیروستی میں درجۂ حرارت منفی اٹھائیس اعشاریہ چھ ڈگری سینٹی گریڈ جبکہ شہر لوخوویتسی میں منفی اٹھائیس اعشاریہ سات ڈگری سینٹی گریڈ ریکارڈ کیا گیا، جو رواں موسمِ سرما کی انتہائی کم سطح ہے۔ ماہر موسمیات کا کہنا ہے کہ دارالحکومت اور اس کے گرد و نواح میں سردی کی یہ شدید لہر غالباً اپنے عروج سے گزر چکی ہے۔ ان کے مطابق آئندہ رات نسبتاً گرم ہوا کا داخلہ متوقع ہے، جس کے ساتھ برف باری بھی ہو سکتی ہے، جبکہ درجۂ حرارت منفی دس سے منفی بارہ ڈگری سینٹی گریڈ کے درمیان رہے گا۔ لیؤس نے مزید بتایا کہ اگلے تین دنوں میں درجۂ حرارت معمول کے قریب رہے گا، تاہم جنوری کے اختتام پر ایک اور نسبتاً ہلکی سرد لہر کا امکان موجود ہے۔ 
