پاکستان خفیہ ایٹمی تجربات کر رہا ہے، ڈونلڈ ٹرمپ
ماسکو (انٹرنیشنل ڈیسک)
امریکی صدر ڈونلڈ ٹرمپ نے الزام عائد کیا ہے کہ پاکستان، چین اور روس خفیہ طور پر ایٹمی ہتھیاروں کے تجربات کر رہے ہیں، جب کہ امریکہ واحد بڑی طاقت ہے جو اس عمل سے گریز کر رہا ہے۔ امریکی ٹی وی پروگرام “60 منٹس” کو دیے گئے انٹرویو میں ٹرمپ نے انکشاف کیا کہ انہوں نے پینٹاگون کو فوری طور پر ایٹمی تجربات دوبارہ شروع کرنے کی ہدایت دی ہے۔ ان کے بقول، “شمالی کوریا، پاکستان اور دیگر ممالک ایٹمی تجربات کر رہے ہیں مگر وہ اس کا اعلان نہیں کرتے۔ ٹرمپ کے اس بیان کے بعد عالمی سطح پر تشویش کی لہر دوڑ گئی ہے کہ آیا امریکہ 1992 کے بعد پہلی مرتبہ نیا ایٹمی تجربہ کرنے کا ارادہ رکھتا ہے۔ امریکی صدر نے مزید کہا کہ امریکہ کے پاس “اتنا بڑا ایٹمی ذخیرہ ہے جو دنیا کو 150 مرتبہ تباہ کر سکتا ہے”، تاہم ان کے مطابق تجربات ضروری ہیں تاکہ یہ پرکھا جا سکے کہ “یہ ہتھیار کس حد تک مؤثر ہیں۔”
ٹرمپ نے دعویٰ کیا کہ “روس اور چین خفیہ تجربات کر رہے ہیں، ہم واحد ملک ہیں جو نہیں کرتے، اور میں نہیں چاہتا کہ ہم واحد ملک رہیں جو تجربات سے گریز کرے۔” انہوں نے کہا کہ امریکہ ایک کھلا معاشرہ ہے جو شفاف انداز میں کام کرتا ہے۔ “اگر دوسرے ممالک تجربات کر رہے ہیں تو ہمیں بھی کرنا ہوں گے،” ٹرمپ نے زور دے کر کہا۔پاکستان کے دفترِ خارجہ نے تاحال ان الزامات پر کوئی ردعمل ظاہر نہیں کیا۔ ماہرین کے مطابق ٹرمپ کے بیانات امریکہ کی ایٹمی عدم پھیلاؤ پالیسی پر سوالات اٹھاتے ہیں اور اگر امریکہ نے ایٹمی تجربات دوبارہ شروع کیے تو یہ بین الاقوامی معاہدوں اور عالمی امن کے لیے سنگین خطرہ بن سکتا ہے۔ 
