اسلام آباد (صداۓ روس)
یورپی یونین کی خارجہ امور اور سیکیورٹی پالیسی کی سربراہ Kaja Kallas نے کہا ہے کہ پاکستان خطے کی ایک بڑی طاقت اور یورپی یونین کا اہم شراکت دار ہے، جبکہ امریکا ایران تنازع کے حل کے لیے اسلام آباد کے ثالثی کردار کو بھی قابلِ تعریف قرار دیا ہے۔ اسلام آباد میں پاکستان اور یورپی یونین کے درمیان آٹھویں اسٹریٹجک مذاکرات کے بعد نائب وزیراعظم اسحاق ڈار کے ساتھ مشترکہ پریس کانفرنس سے خطاب کرتے ہوئے کایا کالاس نے کہا کہ پاکستان کا کردار خطے میں امن و استحکام کے لیے انتہائی اہمیت رکھتا ہے۔ انہوں نے کہا کہ امریکا اور ایران کے درمیان کشیدگی کے باعث عالمی سطح پر توانائی کا بحران پیدا ہو رہا ہے، اس لیے مستقل جنگ بندی اور مذاکرات کا تسلسل ناگزیر ہو چکا ہے۔ ان کے مطابق پاکستان کی جانب سے ثالثی کی کوششیں قابلِ ستائش ہیں اور یہ عالمی سفارت کاری میں مثبت پیش رفت کی علامت ہیں۔ کایا کالاس نے اپنے دورۂ پاکستان پر اطمینان کا اظہار کرتے ہوئے کہا کہ پاکستان کو بین الاقوامی قوانین کے مطابق اپنے دفاع اور عوام کے تحفظ کا حق حاصل ہے۔ انہوں نے پاک بھارت کشیدگی کا ذکر کرتے ہوئے کہا کہ اس کے سنگین نتائج خطے کے استحکام کے لیے خطرہ بن سکتے تھے، اسی لیے یورپی یونین نے دونوں ممالک پر مسلسل تحمل اور کشیدگی میں کمی پر زور دیا۔
انہوں نے مزید کہا کہ 2026 کے لیے یورپی یونین کا ہدف پاکستان کے ساتھ تعلقات کو مزید مضبوط اور مستقبل کے لیے زیادہ مربوط بنانا ہے۔ ان کے مطابق یورپی یونین پاکستان کے ساتھ مختلف شعبوں میں تعاون کو وسعت دینے کی خواہاں ہے۔ دورے کے دوران یورپی یونین کی اعلیٰ عہدیدار صدر Asif Ali Zardari، وزیر اعظم Shehbaz Sharif اور فیلڈ مارشل Asim Munir سے بھی ملاقاتیں کریں گی، جن میں دوطرفہ تعلقات اور علاقائی صورتحال پر تفصیلی تبادلہ خیال کیا جائے گا۔
