پاکستان نے جنوبی افریقہ کو شکست دے کر ون ڈے سیریز اپنے نام کرلی
فیصل آباد (صدائے روس)
پاکستان نے جنوبی افریقہ کو تیسرے ایک روزہ میچ میں 7 وکٹوں سے شکست دے کر تین میچوں کی سیریز 1-2 سے جیت لی۔ فیصل آباد کے اقبال اسٹیڈیم میں کھیلے گئے میچ میں قومی ٹیم نے مہمان ٹیم کا 144 رنز کا ہدف 26ویں اوور میں 3 وکٹوں کے نقصان پر حاصل کرلیا۔ بیٹنگ کے دوران نوجوان بلے باز صائم ایوب نے ایک چھکے اور 11 چوکوں کی مدد سے 77 رنز کی شاندار اننگز کھیل کر فتح میں کلیدی کردار ادا کیا۔ کپتان بابر اعظم نے 27 رنز بنائے جبکہ محمد رضوان 32 اور سلمان علی آغا 5 رنز پر ناٹ آؤٹ رہے۔ اوپنر فخر زمان بغیر کوئی رن بنائے پویلین لوٹ گئے۔ اس سے قبل جنوبی افریقہ نے ٹاس جیت کر بیٹنگ کا فیصلہ کیا، مگر قومی بولرز کے سامنے پوری ٹیم 37.5 اوورز میں صرف 143 رنز پر ڈھیر ہو گئی۔ جنوبی افریقی بلے باز کوئنٹن ڈی کوک نے 53، یوہان ڈی پریٹوریس نے 39 جبکہ پیٹر اور میتھیو برٹزکی نے 16، 16 رنز اسکور کیے۔
پاکستان کی جانب سے ابرار احمد نے شاندار بولنگ کرتے ہوئے 4 وکٹیں حاصل کیں، جبکہ شاہین شاہ آفریدی، سلمان آغا اور محمد نواز نے دو، دو کھلاڑیوں کو آؤٹ کیا۔ تیسرے میچ کے لیے قومی ٹیم میں دو تبدیلیاں کی گئیں — نسیم شاہ اور محمد وسیم جونیئر کی جگہ ابرار احمد اور حارث رؤف کو موقع دیا گیا۔ یاد رہے کہ سیریز کے پہلے ون ڈے میں پاکستان نے کامیابی حاصل کی تھی جبکہ دوسرا میچ جنوبی افریقہ کے نام رہا تھا۔ 
