ماسکو(انٹرنیشنل ڈیسک)
اسپین اور فرانس میں موسمیاتی تبدیلیوں اور شدید گرمی کی لہروں کے باعث جنگل کی آگ کے مزید پھیلنے کا شدید خطرہ ہے۔ موسمیاتی ماہرین نے خبردار کیا ہے کہ آنے والے دنوں میں سپین اور فرانس میں جنگل کی آگ کے مزید پھیلنے کا خطرہ ہے، جبکہ دونوں ممالک میں جاری آگ کو قابو میں لانے کی کوششیں جاری ہیں۔
سپین کی موسمیاتی ایجنسی نے بدھ کو خبردار کیا کہ زیادہ تر سپین اور بیلیرک جزائر میں جنگل کی آگ کا خطرہ بہت زیادہ ہے۔ اس سال یورپ میں جنگل کی آگ سے پہلے ہی گزشتہ دو دہائیوں کی اوسط سے زیادہ رقبہ جل چکا ہے۔ سائنسدانوں کا کہنا ہے کہ انسانی سرگرمیوں کی وجہ سے موسمیاتی تبدیلی گرمی کی لہروں، خشک سالی اور جنگل کی آگ کی شدت کو بڑھا رہی ہے۔
اسپین کے وزیراعظم پیڈرو سانچیز نے گواڈالاخارا کے متاثرہ علاقے کا دورہ کیا اور موسمیاتی تبدیلی کے خلاف سیاسی جماعتوں کے درمیان معاہدے کا مطالبہ کیا۔ انہوں نے کہا کہ “سال بہ سال ہم واضح طور پر دیکھ رہے ہیں کہ موسمیاتی تبدیلی کس طرح ہماری برادریوں میں جانیں لے رہی ہے اور معاشی تباہی پھیلا رہی ہے۔”
فرانس میں کم شدید درجہ حرارت اور ہلکی ہواؤں نے وار علاقے میں جنگل کی آگ پر قابو پانے میں مدد فراہم کی ہے، جہاں 2,500 ہیکٹر رقبہ جل گیا اور 400 افراد کو اپنے گھروں سے بے گھر ہونا پڑا۔ تاہم فرانس کے موسمیاتی ماہرین نے مغربی اور جنوب مغربی فرانس میں مزید آگ کا خطرہ برقرار رکھا ہے۔
فرانس نے جون کے آخر میں شدید گرمی کی لہر کا سامنا کیا جس کے نتیجے میں 17 جون سے 2 جولائی کے درمیان معمول سے 5,764 زیادہ اموات ریکارڈ کی گئیں۔ حکام نے اسے 15 سال سے زائد عمر کے افراد میں غیر معمولی شرح اموات قرار دیا ہے۔
