روسی شہریوں کو مفت طبی امداد: حکومت نے نئی حکمت عملی کی منظوری دے دی
ماسکو (صداۓ روس)
روسی حکومت نے شہریوں کو مفت طبی سہولیات فراہم کرنے سے متعلق ریاستی ضمانتوں کے پروگرام کی منظوری دے دی ہے۔ اس کا اعلان وزیرِاعظم میخائل میشوستن نے بارہ جنوری کو نائب وزرائے اعظم کے ساتھ ہونے والے اجلاس کے دوران کیا۔ ان کے مطابق اس پروگرام کی دفعات کا مقصد نئی ہیلتھ کیئر حکمتِ عملی پر عملدرآمد کو یقینی بنانا ہے، جس پر روسی صدر ولادیمیر پوتن نے گزشتہ دسمبر میں دستخط کیے تھے، اور قومی ترقیاتی اہداف کے حصول کو ممکن بنانا ہے۔ میخائل میشوستن نے بتایا کہ اس پروگرام میں بیماریوں کی روک تھام پر خصوصی توجہ دی گئی ہے۔ ان کے مطابق پہلی مرتبہ روسی شہریوں کو جدید سہولیات سے آراستہ صحت مراکز تک رسائی حاصل ہوگی، جن کا ایک ملک گیر نیٹ ورک قائم کیا جا رہا ہے۔ وزیرِ اعظم کا کہنا تھا کہ ان مراکز میں موجود ماہرین افراد میں بیماریوں کے رجحان کی بروقت نشاندہی کریں گے، جس سے بیماری کے آغاز کو روکا یا مؤخر کیا جا سکے گا۔ انہوں نے کہا کہ یہ صحت مراکز طویل اور صحت مند زندگی سے متعلق طب کی بنیاد ثابت ہوں گے۔ طبی معائنے کے دوران ڈاکٹروں کو اب اضافی ٹیسٹ کرنے کی ہدایت دی گئی ہے، جن کا مقصد دل اور خون کی نالیوں سے متعلق امراض کے خطرات کو ابتدائی مرحلے میں ہی شناخت کرنا ہے۔
نئے پروگرام کے تحت لازمی طبی انشورنس میں شامل اعلیٰ سطحی اور خصوصی علاج کی فہرست کو بھی وسعت دے دی گئی ہے۔ وزیرِ اعظم نے اس بات پر زور دیا کہ بچوں اور ماؤں کی صحت کا تحفظ اس پروگرام کی اولین ترجیحات میں شامل ہے۔ میخائل میشوستن نے وضاحت کی کہ اب نوزائیدہ بچوں کے لیے جینیاتی جانچ حمل کی منصوبہ بندی کے مرحلے اور دورانِ حمل بھی دستیاب ہوگی، جبکہ نوزائیدہ بچوں کی توسیع شدہ اسکریننگ کا عمل بدستور جاری رہے گا۔ اس کے علاوہ سماجی طور پر اہم بیماریوں کے خلاف جدوجہد بھی جاری رہے گی، جن میں کینسر، ذیابیطس اور ہیپاٹائٹس شامل ہیں۔ روسی حکومت کے ریاستی ضمانتوں سے متعلق حکم نامے کے مطابق دو ہزار چھبیس میں بیس سے زائد اقسام کی بیماریوں اور طبی کیفیات کا علاج شہریوں کو مفت فراہم کیا جائے گا۔ دستاویز کے مطابق اس فہرست میں ذہنی امراض، پیدائشی نقائص، غذائی اور میٹابولک عوارض، متعدی اور طفیلی بیماریاں، رسولیاں اور دیگر مختلف طبی مسائل شامل ہیں۔ 
