ماسکو(انٹرنیشنل ڈیسک)
امریکی صدر ڈونلڈ ٹرمپ نے کہا ہے کہ وہ ایران کے سپریم لیڈر مجتبیٰ خامنہ ای سے ملاقات کے خواہاں ہیں اور مناسب حالات میں مستقبل میں ایسی ملاقات ممکن ہو سکتی ہے۔
امریکی اخبار نیویارک پوسٹ کو دیے گئے انٹرویو میں ڈونلڈ ٹرمپ نے کہا کہ وہ مجتبیٰ خامنہ ای سے ملاقات کرنا چاہتے ہیں۔ ان کا کہنا تھا کہ وہ مختلف رہنماؤں سے ملاقات کے حق میں ہیں اور اگر حالات سازگار رہے تو مستقبل میں ایرانی سپریم لیڈر سے بھی ملاقات ہو سکتی ہے۔ ٹرمپ نے مزید کہا کہ ان کے خیال میں مجتبیٰ خامنہ ای ایران میں فیصلہ سازی کے عمل میں مکمل طور پر شامل ہیں اور اہم معاملات میں مرکزی کردار ادا کرتے ہیں۔ امریکی صدر نے یہ دعویٰ بھی کیا کہ ایران جوہری ہتھیاروں کی تیاری ترک کرنے پر آمادہ ہو گیا ہے۔ ان کے مطابق اگر دونوں ممالک کے درمیان ممکنہ معاہدہ طے پا جاتا ہے تو اس کے نتیجے میں کئی مثبت پیش رفتیں سامنے آ سکتی ہیں۔
ٹرمپ نے معاہدے کی مزید تفصیلات بیان نہیں کیں، جبکہ ایرانی حکام کی جانب سے بھی ان کے تازہ بیانات پر فوری طور پر کوئی باضابطہ ردعمل سامنے نہیں آیا۔ امریکہ اور ایران کے درمیان حالیہ مہینوں میں کشیدگی، سفارتی رابطوں اور جوہری پروگرام سے متعلق مذاکرات عالمی توجہ کا مرکز بنے ہوئے ہیں، جبکہ دونوں ممالک کے تعلقات کا مستقبل خطے کی مجموعی صورتحال پر اہم اثرات مرتب کر سکتا ہے۔
