ماسکو (صداۓ روس)
روس کے صدر ولادیمیر پوتن نے Victory Day Parade کے موقع پر ریڈ اسکوائر میں خطاب کرتے ہوئے یومِ فتح کو روس کا مقدس اور سب سے اہم قومی دن قرار دیا۔
Red Square میں ہونے والی پریڈ سے خطاب میں صدر پوتن نے کہا کہ روس عظیم محبِ وطن جنگ کے ہیروز اور فتح دلانے والے سپاہیوں کی میراث اور ان کی وصیتوں کا مقدس احترام کرتا ہے۔
انہوں نے کہا کہ دوسری جنگِ عظیم کے دوران سوویت فوجیوں کی بے مثال استقامت، عوامی ملیشیاؤں کی قربانیوں اور محاذِ جنگ کے پیچھے عوام کی انتھک جدوجہد کو ہمیشہ یاد رکھا جائے گا۔ ان کے مطابق فتح ہمیشہ روس کی رہی ہے اور آئندہ بھی روس ہی کی رہے گی۔
صدر پوتن نے جنگ میں جان قربان کرنے والوں کو خراجِ عقیدت پیش کرتے ہوئے کہا کہ روس ان تمام افراد کے سامنے سر جھکاتا ہے جو مادرِ وطن کے دفاع میں شہید ہوئے، جنہوں نے محاصروں، بھوک، قید اور قبضے کے دوران جانیں گنوائیں۔
انہوں نے کہا کہ عظیم محبِ وطن جنگ کی یاد، اس کی حقیقی تاریخ اور اصل ہیروز کا تحفظ روس کے لیے اعزاز اور ذمہ داری ہے۔ ان کے مطابق یہ یادیں خاندانوں، بچوں، پوتوں اور آنے والی نسلوں کے دلوں میں زندہ ہیں۔
صدر پوتن نے کہا کہ سوویت عوام نے نازی ازم کے خلاف فیصلہ کن کردار ادا کیا اور دنیا کو “مطلق اور بے رحم برائی” سے نجات دلائی۔ انہوں نے زور دیا کہ سوویت فوجیوں نے یورپ کے عوام کی آزادی اور وقار کے لیے بے مثال قربانیاں دیں۔
روسی صدر کے مطابق سوویت یونین کے عوام نے یہ ثابت کیا کہ وطن سے وفاداری وہ عظیم حقیقت ہے جو لاکھوں افراد کو متحد کر سکتی ہے۔ انہوں نے کہا کہ روس کی کامیابی کی بنیاد اخلاقی و روحانی طاقت، بہادری، اتحاد اور ہر آزمائش کا مقابلہ کرنے کی صلاحیت میں پوشیدہ ہے۔
صدر پوتن نے کہا کہ نازی قیادت نے سوویت یونین کی اقوام کے خلاف نسل کشی کا منصوبہ بنایا تھا، لیکن وہ روسی کردار، عزم اور روحانی قوت کو سمجھنے میں ناکام رہی، جو مشکل ترین حالات میں مزید مضبوط ہو کر سامنے آتی ہے۔
انہوں نے اس بات پر بھی زور دیا کہ سوویت عوام نے نہ صرف اپنے ملک بلکہ پوری دنیا کو نازی ازم سے بچایا، اور روس اس تاریخی کارنامے کو ہمیشہ یاد رکھے گا۔
