ماسکو (صداۓ روس)
روس اور چین نے یوکرین بحران کے بنیادی اسباب کو حل کرنے کی ضرورت پر زور دیتے ہوئے کہا ہے کہ اسی سے اس تنازعے کا مستقل حل ممکن ہے۔ دونوں ممالک کے صدور ولادیمیر پوتن اور شی جن پنگ کی بیجنگ میں ملاقات کے بعد جاری مشترکہ بیان میں کہا گیا ہے کہ روس اور چین عالمی گورننس کے نظام کو مزید منصفانہ اور معقول بنانے کے لیے مل کر کام کریں گے۔
بیان کے اہم نکات:
دونوں ممالک فوجی تعاون کے طریقہ کار کو بہتر بنائیں گے اور مشترکہ فوجی مشقوں اور فضائی و سمندری گشتوں کو وسعت دیں گے۔
روس اور چین قومی کرنسیوں میں لین دین کو مزید بڑھائیں گے۔
شمالی سمندری راستے (Northern Sea Route) پر کارگو ٹریفک میں اضافہ کیا جائے گا۔
دونوں ممالک مصنوعی ذہانت، جدید ٹیکنالوجی، شپ بلڈنگ اور ایوی ایشن انڈسٹری میں تعاون بڑھائیں گے۔
GLONASS اور BeiDou نیوی گیشن سسٹم کے درمیان ہم آہنگی کو یقینی بنایا جائے گا۔
دونوں ممالک یکطرفہ پابندیوں کی مخالفت کریں گے اور اقوام متحدہ کی سلامتی کونسل کے بغیر کسی بھی پابندی کو غیر قانونی قرار دیتے ہیں۔
بیان میں دونوں ممالک نے دوسری عالمی جنگ کے نتائج کی اہمیت کو برقرار رکھنے اور تاریخ کی درست تشریح کی حمایت کا عزم بھی ظاہر کیا ہے۔
